Ներդրողների «ճաշակը» շատ տարբեր կարող է լինել.Ռուստամ Բադասյան

Տնտեսություն 12:15 08/04/2021 Հայաստան

«Ներդրողների «ճաշակը» շատ տարբեր կարող է լինել: Մեկ անձ կարող է ուզենա ավելի շատ կառավարմանը մասնակցել, մյուսը՝ ավելի շատ շահաբաժին ունենալ, մյուսն էլ համադրված տարբերակ ընտրի, որպեսզի իր ներդրումներն ավելի հաջող իրականացնի»,- կառավարության այսօրվա նիստում հայտարարեց արդարադատության նախարար Ռուստամ Բադասյանը՝ ներկայացնելով «Բաժնետիրական ընկերությունների» մասին օրենքում փոփոխությունների նախագիծը:

Նա հայտնեց, որ ներկայում կա երկու տեսակի բաժնետոմս՝ հասարակ և արտոնյալ:

Ըստ Բադասյանի՝ նախագծով կթույլատրվի, որ հասարակ, սովորական բաժենտոմսերը ևս ունենան դասեր և դրանց որոշակի տեսակների կարելի է ավելի շատ քվեարկելու հնարավորություն ընձեռել, իսկ մեկ այլ դասի բաժնետոմսին՝ հակառակը:

«Մենք այս նախագծով տալիս ենք նման հնարավորություն, միաժամանակ սահմանափակում ենք, որ միևնույն դասի բաժնետոմսով առավելագույն քվեարկելու իրավունքը՝ 10 ձայն կհամարվի սեփականատիրոջ համար»,-հայտնեց նախարարը:

Բադասյանը հայտնեց, որ նախագծով կազատականացվեն խոշոր գործարքների վերաբերյալ կարգավորումները, հնարավորություն կտրվի դրանք կնքելու որոշումներն ընկերութունում ճկունություն ապահովել և ընդհանուր ժողովից շատ դեպքերում տեղափոխել խորհուրդ կամ գործադիր մարմին:

Նրա խոսքով փոփոխություններ կլինեն նաև աշխատակիցների բաժնետիրացման մասով՝ ներդնելով աշխատակիցների բաժնետիրացման ժամանակակից և գործուն մոտեցումներ:

Արդարադատության նախարարը հավաստիացրեց, որ փոփոխություններով հնարավրություն է տրվում, որ գործատուն իր աշխատակցի՝ ընկեերությունը լքելը կանխելու նպատակով բաժնետիրացման շրջանակներում արտոնյալ պայմաններով բաժնետոմս կարողանա տալ նրան, ինչը կխրախուսի տվյալ աշխատողի աշխատանքն ընկերությունում:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: