Ձեր վստահելի աղբյուրը

Ռուսաստանի խաղաղապահ զորամիավորման զինծառայողները շարունակում են վերահսկել Բերձորի միջանցքում հրադադարի ռեժիմի պահպանումը և երթևեկության անվտանգությունը, ինչպես նաև՝ սննդի և տարբեր բեռների տեղափոխումը:

Ըստ ՌԴ ՊՆ-ի՝ հրադադարը պահպանվում է շփման գծի ողջ երկայնքով:

Ռուսաստանի խաղաղապահ զորակազմի դիտակետերի անձնակազմերը պարբերաբար իրականացնում են մարտական վարժանքներ և զորավարժություններ՝ խախտումները ինչպես և դիտակետի վրա հնարավոր հարձակումները կանխելու սցենարներով:

Խաղաղապահների բոլոր դիտակետերը հագեցած են հատուկ ամրություններով, որոնք նախատեսված են զինծառայողներին փոքր տրամաչափի զենքերից և բեկորներից պաշտպանելու, ինչպես նաև հարակից տարածքի բազմակողմանի դիտարկում իրականացնելու համար:

Բացի այդ, Արցախում ռուսական խաղաղապահ զորախմբի անձնակազմի տեղակայման պայմանները բարելավելու համար, ՌԴ ՊՆ նյութատեխնիկական ստորաբաժանման մասնագետները սեղմ ժամկետներում կառուցել են բլոկ-մոդուլային ավաններ:

Բլոկ-մոդուլային ավանները լիարժեք ինքնաբավ օբյեկտներ են, որոնք հագեցած են կյանքի ապահովման համակարգերի բոլոր անհրաժեշտ բաղադրիչներով (էլեկտրամատակարարում, ջեռուցում, սանհանգույցներ, ջրամատակարարում, կոյուղի): Բնակելի հատվածները հագեցած են կահույքով (մահճակալներ, պահարաններ, խոհանոցային հավաքածուներ, սեղաններ, աթոռներ, ցնցուղներ), ինչպես նաև կենցաղային տեխնիկա (էլեկտրական վառարաններ, սառնարաններ, լվացքի մեքենաներ, միկրոալիքային վառարաններ, հեռուստացույցներ, օդորակիչներ, կաթսաներ):

Յուրաքանչյուր ավանի տարածքում կա արհեստական խոտածածկով մարզադահլիճ, լոգարան, բժշկական կենտրոն, չորանոց, հագուստի մաքրման սենյակ, հանգստի սենյակ, գրասենյակ, պահեստ, ճաշարան և մթերային խանութ: