Ձեր վստահելի աղբյուրը

Հայրենիքի պաշտպանի վերականգնողական կենտրոնում բուժում ստացող զինվորների ձեռքի աշխատանքների բարեգործական ցուցահանդես-վաճառքից հավաքված 2 612 000 դրամ զինվորները կնվիրաբերեն Զինվորի տանը: Այս մասին տեղեկանում ենք «Աջակցություն Վիրավոր Զինվորներին» ֆեսյսբուքյան էջից: 

«2 612 000 դրամ զինվորները կնվիրաբերեն Զինվորի տանը  

Beauty By Soldiers ծրագրի շրջանակում մեր առաջին ցուցահանդեսն ավելին, քան հաջողված էր:  Տղաները վաճառեցին իրենց ձեռքի աշխատանքներն ու ամբողջ հասույթը նվիրաբերեցին Զինվորի տանը՝ իրենց և իրենց ընկերների բուժման համար:

2 ամսվա ընթացքում մեր Հելեն Առաքելյանի գաղափարը վերածվեց ցուցահանդեսի և այսօր էլ աննախադեպ մեծ թափով զարգանում է, ապագայի համար մեծ նախագծեր են ծրագրվում»,- նշված է էջում: 

Հիշեցնենք, որ տղաները թիթեռներից կոմպոզիցիաներ էին պատրաստում:

Նախագծի հեղինակ Հելեն Առաքելյանն ավելի վաղ Panorama.am-ի հետ զրույցում պատմել էր, թե ինչպես որոշեց նման նախաձեռնությամբ հանդես գալ. «Մտածում էի՝ ինչ կարող եմ անել տղաների կողքին լինելու համար և ինչը կօգնի նրանց: Ես այս աշխատանքով արդեն 10 տարի է չէի զբաղվում: Հասկացա, որ տղաներին կօգնի այս աշխատանքը, քանի որ ձեռքի աշխատանքը հանգստացնում է նյարդային համակարգը, նաև գեղեցիկը, ստեղծագործելու ընթացքը զբաղեցնում է մարդու միտքը: Իրենց շատ ուրախացնում է ստեղծագործական աշխատանքը, գեղեցիկը: Ես չսխալվեցի»:

Տղաները խոստովանել են, որ իրենց շատ է օգնել այս աշխատանքը՝ կարողացել են փոքր ինչ ցրվել պատերազմի դաժան հիշողություններից։