Ձեր վստահելի աղբյուրը

«Եթե երեկվա խաբկանքը, կեղծիքը չլիներ, դժվար թե այսօր փողոցներ փակվեին Շիրակում, մարդիկ անելանելի վիճակից այդ ծայրահեղ քայլերին են դիմում»,- ՊՆ դիմաց լրագրողների հետ զրույցում ասաց ԱԺ պատգամավոր Սոֆյա Հովսեփյանը:

Նա նշեց, որ առավոտից փակ են Շիրակի մարզի տարբեր ճանապարները, պարալիզացված վիճակ է, պահանջում են հանդիպում Նիկոլ Փաշինյանի հետ, պարզելու գերության մեջ գտնվող իրենց հարազատների վերադարձի հարցը: 

«Երեկվանից պայմանավորվածություն կար, որ այսօր ժամը 16:00-ին պետք է հանդիպեին Փաշինյանի հետ, սակայն կարծես թե չեն գալիս հանդիպման, պահանջում են անձամբ Փաշինյանը գնա իրենց հետ հանդիպման: Հիմա կլինի ԱԱԾ պետի հանդիպումը, կփորձեն հասկանալ, թե ինչ էր երեկվա միֆը»,- ասաց անկախ պատգամավորը:

Հիշեցնենք, որ երեկ նախ պաշտոնապես հայտարարվեց, որ Ադրբեջանից գերիներ են վերադառնալու Հայաստան, ապա կրկին պաշտոնապես հերքվեց «գերիների հետ վերադարձը, ցավոք, կրկին հետաձգվում է»: 

Դիտարկմանը՝ իշխանությունները մեկ ընդդիմության են մեղադրում, որ իրենց հանրահավաքներով խանգարում են գերիների վերադարձին, մեկ գերիների հարազատներին, որոնք երբեմն ակցիաներ են իրականացնում, Ս. Հովսեփյանն ասաց. «Կարծում եմ՝ ամեն ինչին խանգարում է անգործությունը, ուրիշ ոչ մի բան: Եթե կազմակերպված աշխատենք լինի, որևէ մեկը որևէ բանի չի կարող խանգարել»:

Ինչ վերաբերում է ՊՆ մուտքերը փակած անհետ կորած և գերեվարված զինծառայողների հարազատների գործողություններին, նա նշեց, որ նրանք պահանջում են հանդիպում պաշտպանության նախարարի կամ ԳՇ պետի հետ:

«Առաջարկեցին 10-ական խմբերով հանդիպում, սակայն հարազատները հրաժարվեցին, պահանջում են, որ նախարարը դուրս գա և հանդիպի բոլորի հետ: Հավանաբար նախարարության մոտեցումն այդպես է, որ պետք  է փոքր խմբերով քննարկումներ անել: Հիմա ոստիկանապետն է ներսում»,- ասաց պատգամավորը։