«Այդ ժամանակվանից ես գիշերը վատ եմ քնում». Չարլզ Միշելը՝ Եվրահանձնաժողովի ղեկավարին աթոռ չտալու մասին

Քաղաքական 16:30 10/04/2021 Աշխարհում

Եվրախորհրդի ղեկավար Չարլզ Միշելը խոստովանել է, որ ինքը գիշերը լավ չի քնում Անկարայում բանակցություններում տեղի ունեցած միջադեպի պատճառով, երբ Եվրահանձնաժողովի նախագահ Ուրսուլա ֆոն դեր Լեյենն աթոռ չստացավ: Այդ մասին գրում է «ՌԻԱ նովոստի»-ն:

«Ես խորապես ցավում եմ այս միջադեպի համար: Եթե դա հնարավոր լիներ, ես կվերադառնայի հետ և կշտկեի այն: Դա մղձավանջային միջադեպ էր», - ասել է Միշելը «Handelsblatt» թերթին տված հարցազրույցում:

«Չեմ թաքցնում, որ այդ ժամանակվանից ես գիշերը վատ եմ քնում, քանի որ այդ տեսարաններն անընդհատ գլխումս են: Ես վախենում էի, որ եթե ինչ-որ կերպ արձագանքեմ, շատ ավելի լուրջ միջադեպ կհրահրեմ»,- ընդունել է Եվրոպական խորհրդի ղեկավարը:

Անցած երեքշաբթի Անկարայում տեղի ունեցավ Թուրքիայի նախագահ Թայիփ Էրդողանի հանդիպումը ֆոն դեր Լեյենի ու Միշելի հետ: Համացանցում հրապարակված այս հանդիպման կադրերը ցույց են տալիս, որ կազմակերպիչները բանակցողների համար տրամադրել են ընդամենը երկու աթոռ՝ Եվրամիության և Թուրքիայի դրոշների ֆոնին: Նրանցից մեկը գրավեց Միշելը, իսկ երկրորդը՝ Էրդողանը: Եվրահանձնաժողովի ղեկավարը ստիպված էր բազմոցին նստել Թուրքիայի արտաքին գործերի նախարար Մեվլութ Չավուշօղլուի դիմաց, ով, ըստ դիվանագիտական արարողակարգի, ավելի ցածր աստիճանի է:

Ավելի վաղ եվրոպացի մի շարք քաղաքական գործիչներ, այդ թվում ՝ եվրախորհրդարանականներ, քննադատել էին Անկարայում տեղի ունեցած միջադեպը: Չխնայեցին նաև Եվրոպական խորհրդի ղեկավարին, որը, ըստ որոշ պատգամավորների, պետք է հոգար ֆոն դեր Լեյենի նկատմամբ արժանապատիվ վերաբերմունքի հարցը:

Եվրահանձնաժողովի խոսնակ Էրիկ Մամերը չորեքշաբթի օրը ասել է, որ Եվրահանձնաժողովի ղեկավարն իր թիմին արդեն հանձնարարել է անհրաժեշտ միջոցներ ձեռնարկել հետագա միջազգային այցերում նման իրավիճակներից խուսափելու համար:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: