Ձեր վստահելի աղբյուրը

«Հիմա տեղեկացնում ենք, որ հետո չասեք՝ չեն տեղեկացրել»,-իշխանական պատասխանատուներին դիմեց «Իմ քայլը» խմբակցությունը լքած Սոֆիա Հովսեփյանը՝ ներկայացնելով «Մարտունի-3» զորամասի 72 զոհված և անհետ կորած զինծառայողների ծնողների նամակում արված հայտարարությունը:

Պատգամավորը տեղեկացրեց, որ նախորդ օրը հանդիպել է «Մարտունի-3» զորամասի 7-րդ վաշտի 72 զինվորների ծնողների հետ, որոնք նամակ են փոխանցել իրեն և խնդրել են բառացի կարդալ այն ամբիոնից, ինչը և արեց:

Նամակում ասվում էր.

«Մենք՝ 67 սպանված և 6 անհետ կորած զինվորների ծնողներս, պահանջում ենք ԱԺ կուսակցություններից և պատգամավորներից՝ լսե՛լ մեր խնդիրը և պատասխան տա՛լ որպես ՀՀ բարձրագույն մարմին:

Մինչև հոկտեմբերի 10-ը երեխաները գտնվել են մարտական դիրքերում՝ «Մարոտւնի 3»-ում: Հրաման է եկել Ջալալ Հարությունյանից, որ այդ դիրքերի վրա հարձակում է սպասվում, խաբելով ասել են, որ տանում են ապահով վայր, սակայն որոշումը եղել է կոնկրետ Հադրութ տեղափոխելը, որը հանձնված է եղել դեռ հոկտեմբերի 9-ից, սկայան 73 հոգանոց վաշտը տեղափոխել են հոկտեմբերի 11-ին:

ԱԺ պատգամավորներից և բոլոր պետական մարմիններից պահանջում ենք գործը քննչական մարմիններից տեղափոխել ԱԱԾ-ի տիրույթ, կազմել քննչական խումբ և անմիջապես զբաղվել այս դիտավորյալ սպանության բացահայտմամբ: Մեր համոզվածությամբ՝ պատասխանատուներն են Ջալալ Հարությունյանը, Գոռ Իշխանյանը, Մխիթար Ավանեսյանը, Կարեն Առուստամյանը, Կամո Վարդանյանը:

Արդարացի լուծում չտալու դեպքում մենք՝ ծնողներս, պատասխանատու չենք մեր քայլերի համար»:

Պատգամավորը հայտնեց, որ այդ  դեպքով գործ է հարուցված, բայց այն շատ դանդաղ է գնում և գրեթե ոչինչ չի արվում, որն էլ առաջացրել է ծնողների ցասումը:

Սոֆիա Հովսեփյանը խնդրեց ԱԺ պատգամավորներին և ԱԱԾ պետին, լինել հետևողական, քանի որ ծնողներն ասել են, որ իրենց քայլերի համար պատասխանատվություն չեն կրելու: