Ձեր վստահելի աղբյուրը

Ադրբեջանի նախագահ Իլհամ Ալիևն այսօր «Նոր հայացք դեպի Հարավային Կովկաս. հետհակամարտային զարգացում և համագործակցություն» կոնֆերանսի ժամանակ հայտարարել է, որ  Բաքուն Հայաստանի հետ սահմանին ռազմական պլաններ չունի, գրում է Ria-ն։

«Դուք հարցրեցիք, թե ինչ է տեղի ունենալու այն բանից հետո, երբ ռուսական խաղաղապահ զորակազմը լքի տարածաշրջանը: Մենք Հայաստանի հետ սահմաններ ունենք Թովուզում, Զանգիլանում: Մեր սահմանապահ զորքերը գտնվում են հայկական կողմի հարևանությամբ: Կա՞ն միջադեպեր: Ոչ։ Հայկական բանակ չկա,այն բարոյալքված է, մեր զորքերը հինգ մետր հեռավորության վրա են: Բայց մենք ռազմական ծրագրեր չունենք», - հայտարարել է Ալիևը։

Ալիևի մոտ, սակայն, հարցեր են առաջացնում Ռուսաստանի հետ միասին հայկական բանակի արդիականացման ծրագրերը։

«Մենք մեր դիրքորոշումը փոխանցեցինք ռուս գործընկերներին: Ինչո՞ւ է դա արվում: Վրեժխնդրության ցանկացած մտադրություն խստորեն կճնշվի», - ասել է Ալիևը:

Բաքվի կենտրոնում նախօրեին «ռազմավարի այգի» բացելուց հետո, որտեղ ցուցադրում են պատերազմի ընթացքում հայկական կողմից վերցրած ավարը՝ այդ թվում սնունդը, սաղավարտները, սպանված, վիրավոր ու կապկպված հայ զինվորների մանեկենները, այսօր Ալիևը հայտարարում է «Հայաստանի հետ խաղաղության պայմանագիր կնքելու հնարավորության մասին»:

«Մենք կարծում ենք, որ հակամարտության էջը փակ է: Ես արդեն մի քանի անգամ խոսել եմ Հայաստանի հետ հնարավոր խաղաղության համաձայնագրի մասին։ Սրանք մեր ծրագրերն են, բայց հայկական կողմից այդպիսի ազդակներ չկան։ Որպես նախագահ, ես նայում եմ ապագային։ Մենք ամեն ինչ կանենք, (հարաբերությունների նորմալացման համար), եթե լինեն դրական ազդակներ Հայաստանից»,-հայտարարում է Ալիևը:

Հաջորդ մտքում արդեն Ալիևը հակասում է ինքն իրեն, թե հակամարտության էջը փակ է, ու ասում, որ ռազմական գործողությունների ավարտից հետո իրավիճակը Լեռնային Ղարաբաղի շուրջ հակամարտության գոտում շարունակում է մնալ փխրուն:

Ալիևը նաև կոչ է արել Հայաստանի քաղաքացիական հասարակությանը համագործակցել տարածաշրջանում խաղաղության կառուցմանը։

Խոսելով Մինսկի խմբի մասին՝ Ալիևը վերջիններիս կոչ է արել տարածաշրջանում խաղաղություն հաստատելու առաջարկներ ներկայացնել։

«Բաքուն ակնկալում է, որ ԵԱՀԿ Մինսկի խումբը կներկայացնի իր առաջարկները տարածաշրջանում խաղաղ կյանքի հետագա հաստատման վերաբերյալ: Կարծում եմ, որ կան ոլորտներ, որոնցում նրանք կարող են դեր ունենալ հետկոնֆլիկտային իրավիճակում: Ոչ որպես խումբ, որն օգնում է լուծել հակամարտությունը․հակամարտությունն արդեն լուծված է: Երբ ես խոսում եմ Հայաստանի հետ խաղաղության համաձայնագրի մասին, եթե Հայաստանը դիտարկի այս տարբերակը, միջազգային խաղացողների համար գործունեության շատ ոլորտներ կլինեն, այդ թվում դեմարկացիայի, դելիմիտացիայի, փոխգործակցության առումով:  Ես հույսով եմ, նրանք (ԵԱՀԿ Մինսկի խմբի համանախագահները․-խմբ․) շուտով մեզ մոտ կգան որոշ առաջարկներով, և մենք ուշադիր կուսումնասիրենք այդ առաջարկները», - ասում է Ալիևը։