Ձեր վստահելի աղբյուրը

«Ինձ համար այդ «պուրակ» կոչեցյալի մասին տեղեկատվությունը զարմանալի չէր, առավել զարմանալի են ադրբեջանցիների հետ հիմա համատեղ ապրելու ձեր գաղափարները և Թուրքիային բարեկամական ձեռք մեկնելու ձեր մտքերը»,- խորհրդարանական հայտարարությունների ժամին ունեցած ելույթում նշեց «Լուսավոր Հայաստան» խմբակցության պատգամավոր Սրբուհի Գրիգորյանը:

Նա նաև շեշտեց, որ իր համար նորություն չէր և չի կարող լինել Ադրբեջանի և Թուրքիայի մարդատյաց քաղաքականությունը:

Գրիգորյանը հայտնեց, որ պատգամավորական եռագույնի մոտ այսօր «Անմոռուկ» է տեղադրել և հիշեցնելով, որ Ապրլի 24-ին հաշված օրեր են մնացել, նշեց. «Մենք, ի՞նչ է, մի ձեռքով ծաղիկներ ենք դնելու խոնարհումի հուշարձանին, իսկ մյուսով ձեռք ենք պարզելու Թուրքիայի՞ն»:

Պատգամավորը հորդորեց  բարեկամանալու մասին կոչեր անելիս չմոռանալ ազգի արժանապատվության՝ 1.5 միլիոն զոհերի հիշատակի մասին:

Սրբուհի Գրիգորյանը գտնում է, որ 2020 թվականի պատեազմը 100 տարի առաջ հայ ժողովրդի նկատմամբ իրականացված ցեղասպանության շարունակությունն էր, որի ժամանակ կիրառվել են արգելված զենքեր:

Նա հայտարարեց, որ Ադրբեջանը չէր կարող հաղթել միայնակ և նրան անթաքույց և բացահայտ օգնել են, ինչի հետևանքով կորցրել ենք Շուշին, Հադրութը, հազարավոր զոհեր ունենք, որոնք անգին են: 

«Մի քանի օր առաջ Սիսիանի ազատամարտիկների պանթեոնում մի կին միանգամից երեք շիրիմի վրա էր լաց լինում, մեկից մյուսն էր գնում, ասում էր՝ ամբողջ տունս այստեղ է, ով կարող է պատասխան տալ այդ կնոջը, մյուսներին, գերեվարվածենրի ծնողներին»,- հայտարարեց «Լուսավոր Հայաստան» խմբակցության պատգամավորը, և ցավ հայտնեց, որ վերջերս էլ սխալ տեղեկատվությամբ աղ լցվեց գերեվարվարծների ծնողների վերքերի վրա:

Նա գտնում է, որ վերջին դեպքի հանգամանքները պետք է պարզվեն և ֆեյսբուքյան ստատուսները ջնջելով և «թեմայից թռնելով» խնդիրը չի լուծվելու:

«Այսօր այդ թեմաներով պետք է խոսել, պարիտետային փաստահավաք խումբը պետք է ստեղծվի և պարզվի այս ողբերգության բոլոր պատճառները, մեղավորները պատասխան պետք է տան, որպեսզի կարողանանք նայել հայ մայրերի աչքերին, որպեսզի Հայաստանը նման ողբերգական օրեր էլ չապրի»,- եզրափակեց պատգամավորը: