Ձեր վստահելի աղբյուրը

«Հիմա արդեն սուտ խոսելու հետ մեկտեղ դուրս է եկել թրջված գառի վիճակից, որ նոյեմբերի 10-11-ին էր ու սկսել է մեղքը բարդել բոլորի վրա: Այսօր արդեն ինքն ընդհանրապես մեղավոր չէր»,- Դեմիրճյան փողոցում լրագրողների հետ զրույցում ասաց ՀՅԴ ԳՄ անդամ Գեղամ Մանուկյանը՝ անդրադառնալով ԱԺ-ում Նիկոլ Փաշինյանի այսօրվա հայտարարություններին:

Ըստ նրա, այսօր Փաշինյանը մեղադրեց բոլորին, վաղը չզարմանանք, որ մեղավոր հռչակի զոհվածներին, միայն իր դավաճանությունը, իր կառավարման հետևանքով պատերազմի պարտությունն իր վրայից հեռու տանի:

«Արդեն հանրության խելագրության հասցրեց, որ մարդ կարող է իրար հետևից ԱԺ ամբիոնից այդքան սուտ խոսի: Այս մարդն ուղղակի հիվանդագին սուտասան է: Այսօր Ազգային ժողովում Նիկոլը սուտ էր խոսում Լելե Թեփեի մասին, սուտ էր խոսում, ձեռքերը լվանում էր: Ուրիշի վրա էր մեղքը բարդում: Իր կինն է այդ օրը եղել Արցախի նախագահականում, ինքն ու կինն են առանձին սենյակից դուրս եկել, Արարատ Միրոզյանն ու Արայիկ Հարությունյանն էլ գլուխները կախ սպասում էին, թե ինչ են խոսել ամուսիններով: Այդ օրն է հարցազրույց տվել  ՌԲԿ-ով ու խոսել օպերացիայի մասին: Այդ փաստերը մի օրը աչքը կկոխեն շատ այլ փաստերի հետ շատ այլ ստերի դեմն առնելու համար»,- ասաց Գ. Մանուկյանը:

Հիշեցնենք, որ այսօր ԱԺ-ում ընթանում է հերթական քառօրյան: Ներկա է Նիկոլ Փաշինյանը: Նրա հայտարարություններից մեկից հետո «Իմ քայլի» պատգամավորները հոտնկայս ծափահարեցին նրան:

«Այսօր նաև գործ ունեցանք ուսապարկերի նոր մի հոգեկան ստրկության դրսևորման հետ, երբ ծափերով և հոտնկայս կարող են դավաճանական ելույթը ողջունել, խոսել լուսավոր ապագայի մասին, երբ դեռ ծաղիկները մեր զոհվածների շիրիմներին չորացած չեն, բազմաթիվ մեր տղաների աճյուններ դեռ ամփոփված չեն շիրիմներում:

Մարդ, որը կործանման տարավ երկիրը, պետական համակարգը, բանակը, հերթական խաբեության նոր փուլն է սկսում՝ խոսելով լուսավոր ապագաների մասին: Նա մնալու է  իր պարտված անցյալում և ժողովուրդն այդպես էլ նրան տրորելու է այդ անցյալի մեջ»,- ասաց ՀՅԴ-ական գործիչը:

Հիշեցնենք, որ ավելի վաղ Գեղամ Մանուկյանը ֆեյսբուքում գրառում էր արել, որ գնում է Ազգային ժողով: Դրանից հետո Դեմիրճյան փողոցը ոստիկանները փակեցին: Իսկ այժմ մի շարք քաղաքացիներ են հավաքված ԱԺ մոտ:

«Որպես քաղաքացի գրառում եմ արել: Այս իշխանությունն այնքան է վախենում ամեն մի քաղաքացուց, որ ոստիկանությունը բերել, լցրել է այստեղ, որովհետև հասկանում են, որ հոգեկան խանգարված մարդու նկատմամբ ժողովրդի  վերաբերմունքն ինչպիսնն է»,- ասաց Գ. Մանուկյանը: