Ձեր վստահելի աղբյուրը

«Կորոնավիրուսային վարակը դեռ ուսումնասիրության փուլում է, ամեն օր հայտնվում են նոր տվյալներ մարդու օրգանների վրա այդ վարակի ազդեցության մասին, ինչ փոփոխություններ են տեղի ունենում»,- ասուլիսում ասաց «Մեկ առողջություն» կոալիցիայի նախագահ Գրիգոր Գրիգորյանը:

Նա նշեց, որ դեռևս հստակ տվյալներ չկան, թե որտեղից է հայտնվել այս վարակը, ինչը վկայում է այն մասին, որ դեռ վաղ է անել որոշակի հետևություններ այդ վարակի համաճարակաբանության մասին, քանի որ համաճարակաբանությունը դեռ ուսումնասիրված չէ, իսկ եթե ուսումնասիրված չէ, վաղ է խոսել հիվանդության բուժման կամ կանխարգելման անվիճելի միջոցների մասին:

«Բոլոր միջոցները, որոնք այսօր կիրառվում են, դե ֆակտո փորձնական են, որոնցով փորձում է համաշխարհային բժշկական հանրությունը պայքարել, բայց դրանցից ոչ մեկը չի ապացուցել իր անվիճելի առավելությունը մյուսի հանդեպ»,- ասաց Գ. Գրիգորյանը:

Նրա կարծիքով, Հայաստանում պաշտոնապես ներկայացվող կորոնավիրուսային վարակման դեպքերը որևէ աղերստ չունեն իրական պատկերի հետ:

«Առ այսօր իրական հիվանդների և վարակակիրների թիվը դեռևս անհայտ է: Անհայտ է նաև իրական մահերի թիվը, որոնք տեղի են ունեցել կորոնավիրուսի հետևանքով: Մենք պետք է հասկանանք, որ կորոնավիրուսային վարակն ինքնին մահ չի առաջացնում, առաջացնում են տարբեր օրգաններում, հյուսվածքներում, արյունատար անոթներում, թոքերում բարդացումներ և մարդկանց մոտ տարբեր ելք է ունենում հիվանդությունը»,- ասաց մասնագետը:

Նա նաև նշեց, որ Հայաստանում օգտագործվող թեստերը ունեն այնպիսի կեղծ պատասխանների տոկոսայնություն, որ դրանք պարզապես չի կարելի օգտագործել ախտորոշման համար:

Հարցին՝ իսկ ինչո՞ւ է վերջին շրջանում ավելացել վարակման դեպքերը, Գ. Գրիգորյանն ասաց. «Սխալ կլինի մեկնաբանեմ մի բան, որը դեռ չի ստացել իր գիտելիքահեն հաստատումը, չկա ապացուցողական բազա, ընդամենը թղթի վրա գրված թվեր են: Ո՞վ է ասել, որ ավելացել են: Հիշեցնեմ, որ բարձր պաշտոն զբաղեցնող մասնագետը Հանրային հեռուսաատեսության ուղիղ եթերով ասաց՝ մարդիկ որ պատվաստվեն, մենք ստիպված չենք լինի թվեր նկարենք»:

Դիտարկմանը, թե, ըստ իրեն՝ արդյոք վարակվածների թիվն ավելի շատ է, թե քիչ, քան ներկայացվում է  պաշտոնապես,  նա պատասխանեց.

«Ոչ թե վարակվածների, այլ վարակակիրների: Վարակակիրների մեջ հստակ պետք է անջատենք նրանց, ում մոտ կլինիկապես արտահայտվել է, նրանց, ում մոտ չի  արտահայտվել: Ես այդ ամբողջ կլաստերը կոչում եմ վարակակիրներ, ում օրգանիզմում կա: Վարակակիրների քանակը Հայաստանում, ըստ հայտարարված թվերի, կազմում է բնակչության 7-10  տոկոս: Իմ կարծիքով, 50-60 տոկոսը գերազանցող է: Դա կախված է մի շարք գործոններից:

Եթե մենք օգտագործենք զգայուն թեստեր, դրանց պատասխանը լինի գրագետ, ոչ թե, ըստ քմահաճույքի, եթե բոլոր գործոններն անենք իրական, ոչ թե քաղաքական, միանշանակ մեր մոտ պատկերը այլ կլինի, կունենանք  ավելի շատ վարակակիրներ»:

Ինչ վերաբերում է մահվան թվերին, նա նշեց, ամեն տարի լինում են մահեր տարբեր վարակներից ու, կարծում է, որ այդ բոլոր վարակներից մահվան դեպքերը ներկայացվել է կորոնավիրուսից մահեր, ինչը բնակչության շրջանում առաջացրել է վախ, խուճապ:

Խոսելով պատվաստումների մասին, նա ասաց, որ կողմնակից է պատվաստումներին՝ որպես վարակիչ հիվանդությունների կանխարգելման դեռևս ամենաարդյունավետ միջոց, որի արդյունքում, ինչպես հայտնի է մարդկությանը, կանխվել են բազմաթիվ հիվանդություններ:

«Մենք կողմնակից են պատվաստմանն այն պատվաստանյութերով, որոնց ազդեցությունն ուսումնասիրված է, բերում է այն հիվանդությունների կանխարգելմանը, որոնց համաճարակաբանությունն է ուսումնասիրված:

Ինչ վերաբերում է կորոնավիրուսային վարակին, առ այսօր հայտնվում են տեղեկություններ, որ պատվաստումները լիովին չեն կանխարգելում այս վարակը, ինչը վկայում է այն մասին, որ մարդու իմունային  պատասխանը և հակամարմինների արտադրումը կոնկրետ այս վարակի դեմ, խթանիչ  պատվաստանյութերի ազդեցությունը մարդու օրգանիզմի վրա դեռևս լիովին ուսումնասիրված չէ: Իմ կարծիքով, դեռ արտադրվում են այս վարակի հարուցչի որոշ շտամներ, որոնց դեմ պատվաստանյութը կոնկրետ ավելի ցածր պաշտպանություն է  ապահովում, քան նախատեսվում էր»,- ասաց Գ. Գրիգորյանը:

Անդրադառնալով կոնկրետ AstraZeneca և Sputnik V պատվատանյութերին, որոնք այսօր կիրառվում են Հայաստանում, նա նշեց. 

«Առհասարակ դեմ եմ կորոնավիրուսի վարակի դեմ պատվաստմանը Հայաստանում երկու պատվասանյութերով էլ: Մարդկանց երկընտրանքի առաջ են կանգնեցրել այսօր: AstraZeneca պատվաստանյութի  համար շեմ են սահմանվել, 55-ից բարձր: Մասնագիտական տեսակետից այս որոշումն անընդունելի է, բարոյական տեսակետից էլ անընդունելի և վիրավորական:

55-ից բարձր տարիքային խմբի մարդիկ ռիսկային են, ունենում են խրոնիկ, տարիքային հիվանդություններ, օրգանների մաշվածություն, նրանց դեպքում ընդհանրապես  բացառված  է  պատվաստանյութի օգտագործումը, քանի որ կարող է անկանխատեսելի հետևանքների բերել»:

Խոսելով կորոնավիրուսային վարակի բուժման համար օգտագործվող դեղորայքի մասին, նա նշեց, որ ելնելով արտակարգ իրավիճակից, թույլ է տրվել կիրառել դեղորայքներ, որոնք գրանցված չեն Հայաստանում. «Հիմքեր ունենք կասկածելու, որ մեր շատ քաղաքացիների վրա որոշ դեղորայքներ փորձարկվում են,  հիմքեր ունենք կասկածելու, որ որոշ փորձարկումների արդյունքում միգուցե կարող էին տեղի ունենալ մահեր: Դա մեր կասկածներն են, ունենք որոշակի հիմքեր նման կասկածների համար, բայց կսպասենք ապացույցների, որից հետո մեր կոալիցիան կանի համապատասխան հայտարարություն»:

Նա հիշեցրեց, որ դեռևս 2019-2020 թվականներին հայտարարել էր՝  Հայաստանում իշխանությունը բռնազավթած խմբավորման առողջապահության համար պատասխանատու ենթախմբավորումն անթաքույց համագործակցում է ընկերությունների հետ, որոնք հայտնի են նրանով, որ Վրաստանում անցկացրել են կենսաբանական փորձեր մարդկանց շրջանում, որի հետևանքով մասսայական մահեր են տեղի ունեցել:

«Այսօր հայտնվել ենք այնպիս իրավիճակում, որը շատ բարդ է ախտորոշել. մի կողմից կողմնակից լինելով իմունականխարգելմանը, համարում եմ, որ չկատարել իմունականխարգելում վարակիչ հիվանդությունների դեմ հղի է անկանխատեսելի հետևանքներով, կարող ենք ունենալ տարբեր հիվանդությունների մասսայական բռնկումներ, բայց մյուս կողմից այդ իմունականխարգելման գործիքը, երբ հայտնվում է սև, հանցավոր ձեռքերում, այն կարող է ցեղասպանության գործիք դառնալ: Այսօր մենք ողջամիտ կասկածներ ունենք, որ այդ իմունականխարգելման գործիքը հայտնվել է սև ձեռքերում, ուստի պատվաստվելը դարձել է նույնքան վտանգավոր, որքան չպատվաստվելը:

Հետևաբար, օր առաջ այս կենսական նշանակության, ազգային անվտանգության հարցը, այդ գործիքը սև ձեռքից պետք է վերցնել: Այսօր ունենք բավականին տվյալներ, որ կասկածենք բնակչության շրջանում կատարվում են անթույլատրելի գործողություններ»,- ասաց Գ. Գրիգորյանը: