Ձեր վստահելի աղբյուրը

«Կամ ձեր խորհրդականները թույլ են տվել, որ ձեզ խաբեն, կամ նրանք ձեզ խորհուրդ են տվել և դուք չեք լսել ու գնացել եք արկածախնդրության»,- Նիկոլ Փաշինյանին հարց ուղղեց «Լուսավոր Հայաստան» խմբակցության պատգամավոր Գևորգ Գորգիսյանը՝ հիշեցնելով որ նա պաշտպանության գծով ունեցել է երկու խորհրդական, որոնք պետք է օգոստոսի 21-ի ԳՇ պետի՝ փաշինյանի պնդմամբ սխալ զեկույցից հետո խորհուրդներ տային:

Պատգամավորը հետաքրքրվեց, թե Փաշինյանի խորհրդականները թողել են, որ իրեն խաբեն, թե իրենք էլ են աջակցել գլխավոր շտաբի պետի զեկույցին:

Փաշինյանն ասաց, որ խոսքը գնում է խորհրդակցությունների գաղտնազերծված տեղեկատվությունների մասին և կքննարկեն դրանք հրապարակելու հնարավորությունը, եթե տեսնեն, որ դրանից Հայաստանի պետական շահերը չեն տուժում:

Գևորգ Գորգիսյանը նկատելով, որ այդ խորհրդականներից մեկը պաշտպանության նախարարն է, մյուսը վերջերս ԳՇ պետի տեղակալ է նշանակվել, Փաշինյանին հարցրեց. «Հետաքրքիր է իմանալ, թե ինչ են նրանք խորհուրդ տվել, եթե նրանք սխալ զեկույցի կողմնակից են եղել, ապա ինչու են նշանակվել այս կարևոր պաշտոններին, եթե դեմ են արատահայտվել ապա ինչու չեք լսել նրանց խորհրդականներին»:

Փաշինյանը հայտնեց, որ իր երկու խորհրդականներն էլ պատերազմի ընթացքում իրեն խորհուրդ են տվել իրականացնել շատ կտրուկ պաշտոնանկություններ պաշտպանության նախարարությունում, բայց ինքը չի արել պաշտոնանկություն և չի կարող ասել, որ զղջում է, քանի որ նոր նշանակվածները կհայտնվեին մեծ հեղեղի մեջ, որին չէին հասցնի տիրապետել: