Ձեր վստահելի աղբյուրը

«Իհարկե, այսօր տխուր ենք,  պարտվել ենք, բայց, ուզում եմ նախ ներողություն խնդրել իմ բառերի համար, բացի մեր նահատականերից, ամեն ինչը հետ ենք վերադարձնելու։ Համոզված եղեք հարյուր տոկոսով»,-հայտարարեց  Արցախի Հանրապետության անվտանգության խորհրդի քարտուղար, Արցախի հերոս, գեներալ-մայոր Վիտալի Բալասանյանը՝ ելույթ ունենալով ՀՅԴ «Կամավորական շարժում» հասարակական կազմակերպության նահատակ կամավորների պարգևատրման արարողությանը։

Նրա խոսքին հետևեցին բուռն ծափահարություններն։

Շարունակելով խոսքը, Բալասանյանը նշեց՝ մենք անպարտելի ենք։

«Եթե ոչ, ապա անիմաստ կլինի իմ ու իմ նմաների ապրած կյանքը։ Մենք զինվորագրվել ենք մեր երկրին, մեր մեծ Արմենիային՝ Հայաստանին ու Արցախին, վստահ եմ, որ կարճ ժամանակում թե քաղաքական, թե ռազմական, թե սոցիալական, թե տնտեսական ոլորտներում հաղթահարելու ենք բոլոր դժվարությունները: Ես չեմ ուզում կրկնել նրանց խոսքերը, ովքեր ասում էին՝ «հաղթելու ենք», բայց համոզված եղեք՝ հաղթելու ենք,-նշել է նա։

Նա վստահություն հայտնեց, որ հայուհու արգանդը չի չորացել, նոր հերոսներ են ծնվելու։

Տեսանյութը՝ Yerkir.am-ի։

Հիշեցնենք, որ երեկ երեկոյան Հ. Պարոնյանի անվան երաժշտական կոմեդիայի պետական թատրոնում տեղի ունեցավ «Կամավորական շարժում» ՀԿ-ի գումարտակի նահատակների հետմահու պարգևատրման արարողությունը:

Արցախի համար մղված մարտերում գումարտակի՝ հերոսաբար զոհված 27 տղաներից երկուսը հետմահու պարգևատրվեցին Արցախի Հանրապետության «Մարտական խաչ» շքանշանով, մյուսները՝ «Արիության համար» մեդալով: Մեդալներից մի քանիսը ստացան հերոսացածների զավակները։

Պարգևները հանձնեց Արցախի Հանրապետության Անվտանգության խորհրդի քարտուղար, Արցախի հերոս, գեներալ-մայոր Վիտալի Բալասանյանը:

Միջոցառման ժամանակ ցուցադրվեց նաև գումարտակի մարտական ուղուն նվիրված «Կամավորները» փաստագրական ֆիլմը:

Միջոցառմանը ներկա էին նահատակված հերոսների հարազատները, բարեկամները, ընկերները, քաղաքական, ռազմական, հասարակական գործիչներ։