Ձեր վստահելի աղբյուրը

Մեկնարկել է ԱԺ հերթական նիստը։ Շարունակվում է Կառավարության 2020 թվականի ծրագրի կատարողականի քննարկումը։

Փոխվարչապետ Մհեր Գրիգորյանը ներկայացեց Արցախին տրամադրված շուրջ 2 տասնյակ աջակցության ծրագրերը՝ նշելով, որ դրանց մի մասը դեռևս շարունակվում է։

«Անհետ կորած զինծառայողների ընտանիքների աջակցության վեցամսյա միջոցառում ենք իրականացնում՝ ամսական տրամադրելով 500 հազար դրամ։ Սա կամուրջ միջոցառում է, և նպատակ է հետապնդում աջակցություն տրամադրել այնքան ժամանակ, քանի դեռ ընտանիքները չեն դարձել «Զինծառայողների ապահովագրության» հիմնադրամի շահառու։ Այս պահին ունենք նույնականացված 600 ընտանիք, որոնք օգտվում են վերոնշյալ ծրագրից, և մինչ այս պահը նրանց փաստացի 1 միլիարդ դրամ գումար է փոխանցվել։

Խեղում ստացած զինծառայողները ևս վեցամսյա աջակցություն են ստանում՝ ամսական 200 հազար դրամի չափով։ Այստեղ ունենք 265 նույնականացված շահառու, որոնց տրամադրված միջոցները մինչ այս պահը կազմում են 200 միլիոն դրամ»,- ներկայացրեց Մհեր Գրիգորյանը։

Նա նշեց, որ աջակցություն են ստանում նաև արցախցիներին հյուրընկալած ընտանիքները։ Փոխվարչապետի խոսքով, այս ծրագրի շրջանակում վեց ամսվա ընթացքում ամսական 30 հազար դրամ է տրամադրվում ՀՀ-ում արցախցիներին հյուրըկալած ընտանիքներին, և 45 հազար դրամ՝ Արցախի դեպքում։ Այս պահի դրությամբ ծրագրի շահառուների թիվը 8410 է, և 1.1 միլիարդ դրամ արդեն իսկ մոբիլիզացվել ու վճարվել է այս նպատակով։

Մհեր Գրիգորյանը տեղեկացրեց նաև, որ այս պահի դրությամբ 4210 քաղաքացու մեկ կիսամյակի ուսման վճարը ամբողջությամբ վճարել է պետությունը։ Այս պահի դրությամբ ծրագրի վրա ծախսվել է 900 միլիոն դրամ։

«Մահացած և վիրավորում ստացած քաղաքացիական անձանց ընտանիքներին  ևս աջակցություն է տրամադրվում, բայց սա միանգամյա տրամադրվող աջակցություն է՝ 1-5 միլիոն դրամի չափով։ Այստեղ այս պահին ունենք 56 նույնականացված շահառու, և 200 միլիոն դրամ վճարված գումար։ Վիրավորում ստացած զինծառայողներին նույնպես գումար ենք տրամադրում, այս պահին ունենք 6500 նույնականացված շահառու և վճարված 3.3 միլիարդ դրամ»,- ներկայացրեց նա։

Մհեր Գրիգորյաի խոսքով, աջակցություն է տրամադրվում նաև Սյունիքի մարզի Շուռնուխ և Որոտան համայնքների բնակիչներին։ Նա նշեց, որ այս դեպքում աջակցությունը մեկանգամյա 300 հազար դրամի, և վեց ամիս տրամադրվող 68 հազար դրամի չափով է։ Այստեղ շահառու ընտանիքները 35-ն են, և շուրջ 15 միլիոն դրամ արդեն վճարվել է։

«ՀՀ-ում պատերազմի հետևանքով քաղաքացուն պատկանող անշարժ գույքի վնասման համար փոխատուցում է իրականացվել 77 հոգու, տրամադրվել է 50 միլիոն դրամ գումար։
Արցախում հաշվառված քաղաքացիների աջակցության ծրագրով ունեն 77420 հաշվառված շահառու և փաստացի վճարված 5.3 միիլրադ դրամ գումար»,- ասաց Մհեր Գրիգորյանը։

Մեկ այլ՝ արդեն ավարտված ծրագրով 100, 091 արցախցիներին տրամադրվել է 7.3 միլիրադ դրամ գումար։ Արցախի վերահսկողությունից դուրս մնացած տարածքների բնակիչներին աջակցություն է տրամադրվել մեկ անգամ 300 դրամի չափով, այստեղ նույնականացվել է 33981 շահառու, վճարվել է շուրջ 10 միլիարդ 200 միլիոն դրամ։

«Արցախում անշարժ գույք կորցրած անձանց մեկագամյա աջակցություն  է տրամադրվել՝ 250 հազար դրամի չափով, այստեղ ունենք 1 միլիարդ 300 միլիոն դրամ։ Արցախի մինչև 5 տարեկան երեխաներին էլ մեկանգամյա աջակցություն ենք տրամադրել 300 միլիոն դրամի չափով»,- տեղեկացրեց Մհեր Գրիգորյանը։

Ընդհանուր առմամբ, Արցախին տրամադրվող աջակցության ծրագրերի շահառուների թիվն այս պահին գերազանցում է 150 հազարը։