Ձեր վստահելի աղբյուրը

Ռուսաստանն անթույլատրելի է համարում որոշ երկրների ազդակները՝ Կիպրոսի հիմնախնդիրը երկու պետություն սկզբունքի հիման վրա լուծելու հնարավորության մասին ազդակները: Այս մասին, Tass-ի հաղորդմամբ, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:

«Որոշ մայրաքաղաքներից համառ ազդանշանները, որոնք ուղղված են բանակցությունների առկա հիմքերը դաշնայինից երկու պետության մոդելի ճշգրտմանը, անընդունելի են: Գործընթացի հիմնական պարամետրերի ցանկացած փոփոխություն հնարավոր է միայն ՄԱԿ-ի համաձայնությամբ: Կարգավորման կարևոր ասպեկտը մենք դիտարկում ենք կղզու աստիճանական ապառազմականացումը, արտաքին երաշխիքների հնացած համակարգի փոխարինումը ՄԱԿ-ի Անվտանգության խորհրդի երաշխիքներով», - ասել է Զախարովան։

Զախարովան շեշտել է, որ Ռուսաստանը կտրականապես դեմ է դրսից կարգավորման «պատրաստի բաղադրատոմսերին» և ժամկետներ պարտադրելուն, Կիպրոսի համայնքները պետք է որոշեն իրենց ապագան:

«Մեր սկզբունքային դիրքորոշումը մնում է անփոփոխ։ Մենք շարունակում ենք պաշտպանել կղզու բոլոր բնակիչների օգտին համապարփակ, արդար և կենսունակ կարգավորումը` համաձայն ընդհանուր ընդունված իրավական դաշտի, որը ենթադրում է երկհամայնքային ֆեդերացիայի ստեղծում կղզում՝ մեկ միջազգային իրավասուբեյեկտայնությամբ,  ինքնիշխանությամբ ու քաղաքացիությամբ», - ասել է դիվանագետը:

Ռուսաստանի արտգործնախարարության պաշտոնական ներկայացուցիչը նշել է, որ Մոսկվան ուշադիր հետևում է Կիպրոսի կարգավորման վերաբերյալ հանդիպման նախապատրաստական աշխատանքներին, որը ՄԱԿ-ի գլխավոր քարտուղար Անտոնիո Գուտերեշը մտադիր է անցկացնել Ժնևում ապրիլի 27-29-ին, և դրական է գնահատում կողմերի պատրաստակամությունը մասնակցել դրան:

Հիշեցնենք, որ Կիպրոսը բաժանվել է այն բանից հետո, երբ Թուրքիան ներխուժեց կղզու հյուսիսային մասը 1974 թվականին՝ ի պատասխան հեղաշրջման, որը փորձում էր կղզին Հունաստանին միացնել:

Կիպրոսի Հանրապետությունը, որը միջազգայնորեն ճանաչված միակ պետությունն է և Եվրամիության անդամ է, իր լիազորություններն իրականացնում է ՄԱԿ-ի կողմից վերահսկվող բուֆերային գոտու հարավում գտնվող կղզու երկու երրորդի նկատմամբ:

Ինքնահռչակ Հյուսիսային Կիպրոսի Թուրքական Հանրապետությունը (ՀԿԹՀ), որը միջազգային ճանաչում է ստացել միայն Անկարայի կողմից, վերահսկում է կղզու հյուսիսային մասը, որտեղ տեղակայված են շուրջ 30,000 թուրք զինվորներ:

Հոկտեմբերի 18-ին Հյուսիսային Կիպրոսում աջակողմյան ազգայնական Էրսին Թաթարի նախագահ ընտրվելը կարող է փոխել իրավիճակը։ Ի տարբերություն իր նախորդ Մուստաֆա Ակինչիի, որը կողմ էր վերամիավորմանը, Թաթարը պաշտպանում է երկու պետության լուծումը:

Կիպրոսում «երկու պետություն» լուծումը առաջ է տանում Թուրքիան ու Էրդողանը, որը նախորդ տարվա վերջին Հյուսիսային Կիպրոս այց կատարեց։  Հունաստանն էլ պնդում է, որ չի լինելու երկու պետության լուծում Կիպրոսում։