Ձեր վստահելի աղբյուրը

Բուքինգհեմյան պալատը ներկայացրել է արքայազն Ֆիլիպի հուղարկավորությանը հրավիրվածների ցուցակը։ Հուղարկավորության հանդիսավոր արարողությանը հրավիրվածների ցուցակում կա 30 մարդ, ասվում է Բուքինգհեմյան պալատի կայքում:

Շաբաթ օրը՝ ժամը 14:40-ին (Երևանի ժամանակով 17:40-ին), արքայազն Ֆիլիպի մարմնով դագաղը տեղափոխվելու է Վինձորի ամրոցի մատուռից: Սգո թափորը շարժվելու է դեպի Սուրբ Գեորգի մատուռ: Այս մասին գրում է interfax-ը։

Դուքսի բոլոր չորս երեխաները՝ արքայազն Չարլզը, Էնդրյուն, Էդվարդը և արքայադուստր Աննը, ինչպես նաև նրա թոռները՝ արքայազններ Ուիլյամն ու Հարրին, կքայլեն դագաղի ետևից: 

Կորոնավիրուսի սահմանափակումների պատճառով սգո արարողության մասնակիցների առավելագույն քանակը սահմանափակվում է 30 հոգով:

Ելիզավետա Երկրորդ թագուհուց, երեխաներից ու թոռներից բացի հուղարկավորությանը կմասնակցեն արքայազն Ֆիլիպի հարազատները, այդ թվում՝ Բադենի թագաժառանգ արքայազն Բերնհարդը և Հոհենլոհե-Լանգենբուրգի Ֆիլիպը:

Հուղարկավորությունը ուղիղ հեռարձակմամբ կցուցադրվի հեռուստատեսությամբ և ռադիոյով:
Հիշեցնենք, որ արքայազն Ֆիլիպը մահացել է 99 տարեկան հասակում Վինձորում: Էդինբուրգի դուքսը հունիսի 10-ին կնշեր իր 100-ամյակը։