Ձեր վստահելի աղբյուրը

«Լինել նախապատերազմյան ժամանակում նշանակում է պատերազմի պատրաստել պետական ապարատը, համայքները, քաղաքական ու քաղաքացիական դաշտը, ժողովրդին»,- այսօր խորհրդարանում ասաց ԱԺ «Լուսավոր Հայաստան» խմբակցության պատգամավոր Անի Սամսոնյանն՝ անդրադառնալով Նիկոլ Փաշինյանի հայտարարությանը, թե ինքը պետությունը ժառանգել է նախապատերազմյան վիճակում։

Պատգամավորը հարց հնչեցրեց՝ իսկ ի՞նչ էր անում իշխանությունը, ի՞նչ է արվել 3 տարվա ընթացքում։

Անի Սամսոնյանը նշեց, որ կառավարուևթյան 2020 թվականի ծրագրի կատարողականում արտաքին հարաբերությունների դաշտը սնանկ վիճակում էր, և կառավարության ներկայացուցիչների ջանքերը՝ հայտարարելու, թե դիվանագիտությունը չի տապալվել, ճիշտ չէին, քանի որ «դիվանագիտությունը տապալվել է»։

Պատգամավորը հիշեցրեց, որ հուլիսյան մարտերից հետո՝ օգոստոսի 28-ին, Նիկոլ Փաշինյանը շքանշաններ էր տալիս բանակի գեներալներին։

«Այդ ժամանակ Փաշինյանն արեց հետևյալ հայտարարությունը. «մեր կառավարությունն արդեն ավելի քան 2 տարի միջազգային հանրության և Ադրբեջանի ղեկավարության հետ շփումներում, ինչպես նաև հրապարակային հայտարարություններում ընդգծել է  Հայաստանի հետ ուժի, սպառնալիքների, հարկադրանքի լեզվով խոսելու որոշ սուբյեկտների անհեռանկարայնությունը...»։

Ինձ հետաքրքիր է՝ այդ ինչպե՞ս էիք դուք խոսել Ձեր միջազգային գործընկերների հետ դիվանագիտական հարթակներում, որ մենք հակառակը ստացանք։ Ժամանակը ցույց տվեց, որ այս հայտարարությունները կատարվել են ընդամենը ներքին լսարանին բավարարելու համար, և մինչև այսօր հնչում են հայտարարություններ, որ բացառապես ուղղված են ներքին լսարանին»,- շեշտեց ԼՀԿ-ական պատգամավորը։

Նա նկատեց՝ ԱԺ ամբիոնից իշխանությունը փորձում է համոզել, որ 3 տարին բավարար չէր բանակում բարեփոխումներ իրականացնելու համար։ Պատգամավորը չժխտեց, որ 3 տարին բավարար չէր պետության բոլոր փոշոտ անկյունները մաքրելու համար, բայց նաև նշեց, որ օգոստոսի 28-ին Նիկոլ Փաշինյանն ասել էր, թե 2.5 տարի հայոց բանակում տեղի են ունեցել լայնածավալ բարեփոխումներ՝ և՛ տեսանելի, և՛ ոչ հրապարակային։ Փաշինյանն ասել էր, որ այդ բարեփոխումները հուլիսյան մարտերում ցույց են տվել իրենց կենսունակությունը։

«Ի՞նչ է ստացվում, երբ եղավ հաղթանակ, դուք դրա տերն էիք, և բանակը այդ հաղթանակին հասել էր ձեր բարեփոխումներով, բայց երբ ունենք պարտություն, դուք մեզ համոզում եք, թե գիտեք ինչ կա, 3 տարին բավարար չէր բանակում փոփոխություններ անելու։ Ես կարծում եմ, որ 2.5 տարին բավական ժամանակ էր, որ գոնե մեր բանակի ինժեներատեխնիկական վիճակը բարելավեինք։ Զրահաբաճկոններ ու կասկաներ գնելու համար 2.5 տարին բավարար չէ՞ր, ինչո՞ւ պետք է պատերազմի ժամանակ կոպեկ առ կոպեկ փող հավաքեինք, որ այդ հարցը լուծվեր»,- հարց հնչեցրեց նա։

Անի Սամսոնյանի խոսքով, 2.5 տարի շարունակ հակառակը տեղի ունեցավ, իշխանությունները «կամուֆլյաժ» հագած գնում էին Արցախ, դիրքերում լուսանկարվում, ասում էին՝ Արցախն ու Աղդամը մեր հայրենիքն է։

«Բայց ժամանակը ցույց տվեց, թե այդ ցուցամոլությունը մեզ ուր հասցրեց, և հիմա, երբ Հայաստանի ապագայի մասին դուք խոսում եք ծափերով, ցուցամոլությամբ, մեր մեջ վախ է առաջանում»,- ասաց նա։

Նա նկատեց, որ պատերազմի ժամանակ էլ ԲՏԱ նախկին նախարար Հակոբ Արշակյանը ԱԺ պաշտպանության և անվտանգության հարցերի մշտական հանձնաժողովի նիստում խոստումներ է տվել, որոնք չեն կատարվել։

«Նա մեծ-մեծ խոստումներ էր տալիս, որոնք չեմ կարող հրապարակել։ Բայց դրանք չտեսանք։ Պատերազմը մեր գլխին սառը ջուր լցրեց այն առումով, որ ոչ մի պետական ինստիտուտ դրան պատրաստ չէր։ Ուժայինները պատրաստ չէին, ոստիկանության քանի պետ փոխվեց, ԱԱԾ քանի տնօրեն փոխվեց։ Կառավարության կատարողականը ես համարում եմ ձախողված։ Դուք գերեզմանաքար եք դրել ՀՀ ապագայի վրա, 3300 և ավելի կյանքն էր մեր ապագան, դուք չէիք։ 

Եվ եթե ինձ հարցնեն՝ ինչ կասեի Նիկոլ Փաշինյանին, եթե չլինեին տեսախցիկները, կասեի՝ Ձեր խնդիրն այն է, որ դուք 2020-ին չդարձաք ավելի լավ իշխանություն, քան 2019-ին, և 2019-ին էլ ավելի լավը չէր քան 2018-ին։ Դուք չեք դարձել ավելի լավը, և սա պիտի հասկանաք։ Ձեզ միայն նախկիններին ատողները կարող են գնահատել, քանի որ դուք՝ որպես իշխանություն, այլ արժանիք չունեք»,- եզրափակեց խոսքը Անի Սամսոնյանը։