Ձեր վստահելի աղբյուրը

«Մենք հիմա ունենք բարձրացող վարկանիշով նախագահ Ռոբերտ Քոչարյան։ Դա փաստ է»,- «5-րդ ալիք» հեռուստաընկերության «Հարցազրույց» հաղորդման ժամանակ  ասում է ՀՀ երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը։

Նա նշում է, որ, իհարկե, վարկանիշն այն անհրաժեշտ, բայց ոչ բավարար պայմանն է քաղաքական հաջողության հասնելու համար. «Պարզ է, որ նախ և առաջ քաղաքական, պետական ղեկավարը պետք է ունենա իրատեսական ծրագիր, որը համահունչ կլինի ստեծված իրավիճակին, իսկ մեր դեպքում ծանրագույն իրավիճակին,  և թիմ, որը կկարողանա այդ ծրագիրը լրացնել, մշակել և իրագործել։ Սրանք մնացած երկու կարևորագույն պայմաններն են»։

Նա ասում է, որ ծրագիրը կա, թիմի մի մասը կա, թիմ, որով կարելի է  հպարտանալ։

«Հիմա կոնսուլտացիաներ են ընթանում, կարծում եմ՝ քաղաքական խորհրդատվությունների արդյունքում կկարողանանք հանրությանը ներկայացնել այն հավաքական թիմը, որը, վստահ եմ, իրականացնելու է այն ծրագրերը, որոնք հիմա կենսական անհրաժեշտություն են մեզ համար»,- նշում է Վ. Սողոմոնյանը։

Հաղորդավարի դիտարկմանը՝ հավաքական ասելով նկատի ունեք դաշի՞նք, Վ. Սողոմոնյանը պատասխանում է. «Նկատի ունեմ քաղաքական որևէ միություն, դաշինք, որի մանրամասների մասին հիմա չեմ կարող խոսել, կգերադասեմ այն ժամանակ, երբ մեր խորհրդատվություններն ամբողջությամբ  ավարտված լինեն, կկարողանամ խոսել փաստերի, ոչ թե գործընթացների մասին»։

Նա ասում է, որ անցած երեք տարիներին որևէ ոլորտում որևէ հաջողություն չի գրանցվել, որևէ խոստում չի կատարվել, եղել է խայտառակ պարտություն. «Այս ամբողջությունը նաև շաղախված է այն անթույլատրելի դիսկուրսով, որը մենք ունենք վերջին երեք տարիներին՝ կենցաղայնացված, մանիպուլացնող,  հաճախ վիրավորական։ Օրինակ, պլյուս, մինուս 50 զոհը։  Չգիտեմ, ցանկացած քաղաքակիրթ երկրում նման բան ասող մարդն ուղղակի պետք է հավերժ զրկվեր քաղաքականությամբ կամ հասարակական որևէ այլ գործունեությամբ զբաղվելու իրավունքից»։

Վ. Սողոմոնյանի կարծիքով, գալիք ընտրությունների դիլեման բավականին հասկանալի է. «Ես չեմ  ծայահեղացնում ու չեմ չափազանցնում, սա ամենածանր ընտրությունն է լինելու մեր ժողովրդի համար, որովհետև  ընտրության առարկան է շատ ծայրահեղ՝ այսինքն դու մնում ես այստեղ և շարունակում ես  հետադարձը չգիտես թե ինչու, թե անցնում ես այդ կետը, վերականգնվում ես, փորձում ես շարժվել առաջ՝ զարգացնելով, շենացնելով երկիրը,  իսկականից գնալով դեպի ապագա։ Ոչ թե խոսքերով, մենք տեսել ենք այդ մարդու խոսքի գինը, ինչ ասել է, հակառակն է եղել»։

Վ. Սողոմոնյանը համաձայն է հաղորդավարի դիտարկմանը, որ դաշտը հստակ բաժանվել է երկու մասի՝ «մի կողմում ստացվում է  պայմանական Նիկոլ Փաշինյանն է, երկրորդ դաշտում  ստացվում է պայմանական  Ռոբերտ Քոչարյանն է»։ 

«Այդպես արդեն ստացվել է։ Հիմա իմ տպավորությամբ քաղաքական և հասարակական դաշտը կանգնելու է,  եթե անձերին վերցնենք, այդպիսի ընտրության առաջ, եթե վերցնենք ծրագրերն, իրողությունները, ապագան և այլն, ապա կանգնելու է  այն դաժան ընտրության առաջ, որի մասին ասում եմ։

Տեսնում եմ, որ իշխանությունները,  նրանց սպասարկուները փորձում են այս ընտրությունը փափկացնել՝ դե հների ու նորերի, սրանք, նրանք։ Սրանք խոսակցություններ են»,- ասում է  Վ. Սողոմոնյանը։

Անդրադառնալով այն խոսակցություններին, որը եթե Ռոբերտ Քոչարյանը գա, պատերազմ է բերելու, Վ. Սողոմոնյանը նշում է. «Իհարկե, ոչ։

Փաշինյանը ոչ պատերազմի, ոչ խաղաղության կուսակցություն է, նա անարժանապատիվ պարտության, խայտառակ պարտության կուսակցություն է։ Մենք գործ ունենք պարտության կուսակցության հետ։ Փաշինյանի պես թույլ, մեկ անգամ խայտառակ ձևով  պարտված ղեկավարի պաշտոնավարման շարունակությունը անխուսափելիորեն բերելու է նոր պատերազմ։ Սա անխուսափելի է։

Տեսնում եք այս պատերազմում հաղթած Թուրքիան ու Ադրբեջանն ինչ հեգնանքով ու հոխորտանքով են խոսում Հայաստանի մասին։ Եթե այս թույլ, տնտեսապես, քաղաքականապես, արտաքին քաղաքականության մեջ անկարող իշխանությունը մնա, այդ ժամանակ է պատերազմ  լինելու։

Ինչ վերաբերում է  նախագահ Քոչարյանին, ամենայն  պատասխանատվությամբ հայտարարում եմ՝ ռևանշիզմի որևէ ձգտում  այն տեսքով, որի մասին որ խոսում են իշխանության ներկայացուցիչները, թե հեսա կգան, մոբիլիզացիա կանեն, զորքեր կհանեն և այլն, դրա մասին որևէ խոսք չկա։ Դրա կարողությունն էլ չկա։ Պոզների մոտ նախագահ Քոչարյանը դա էր ասում։ Կարծում եմ՝ ինքն իր տեսլականը շատ հստակ ձևակերպեց, որ ԼՂԻՄ տարածքի վերականգնումն արդար  խաղաղության կոնցեպտի շրջանակներում խաղաղ բանակցությունների միջոցով։ Պատերազմական ռևանշի ծրագիր նախագահ Քոչարյանի ծրագրերում չկա»։

Վ. Սողոմոնյանն ընդգծեց՝ հաջորդ իշխանությունը պետք է ծայրահեղ արագ վերականգնման իշխանություն լինի,  սխալվելու իրավունք չունեն։

«Եթե սխալվենք, չհասցնենք վերականգնվել  տնտեսապես, քաղաքականապես, մեր հեղինակությունը, անվտանգությունը, վերքերը բուժենք, նորմալ հարաբերություններ ունենանք մեր հարևանների հետ, եթե մենք այս ամենը չվերականգնենք հնարավորինս սեղմ ժամկետներում, շատ դառը  ճակատագիր է մեզ սպասվում։  Եթե չբերենք ամենալավներին, իրենց  չներգրավենք կառավարման համակարգ, չդիմենք համայն հայության օգնությանը, մաքսիմալ արդյունավետ ներքին համակարգ, կառավարություն չունենանք, շատ դառը պտուղներ ենք քաղելու։ Դրանք ապոկալիպտիկ են։

Մենք եկել ենք, հասել մի հանգրվանի, որտեղ Հայաստանը կանգնած է բազմաթիվ ճակատագրական ընտրությունների առաջ։ Դրամատիկ պատմություններով այս հերոսները  հիմա կանգնած են պատրաստ երկիրն առաջ տանելու։

Հասարակությունն այստեղ մի՞թե հնարավոր է սխալվի։ Ես հավատում եմ հասարակության ողջամտությանը, գաղափարախոսության, ծրագրերի ուժին, հավաքականի ուժին։ Կարծում եմ՝ դա Հայաստանի քաղաքական պատմության մեջ լավագույն հավաքականն է լինելու»,- ասում է  ՀՀ երկրորդ նախագահ Ռոբերտ Քոչարյանի  գրասենյակի ղեկավար Վիկտոր Սողոմոնյանը։

Հարցազրույցն ամբողջությամբ՝ տեսանյութում։