Եկեք չմոռանանք, որ այս թվերի ետևում մարդիկ են․ ԵԽԽՎ պատգամավորը՝ գերիների հարցի քննարկմանը
Եվրոպայի խորհրդի խորհրդարանական վեհաժողովի լիագումար նիստում տեղի ունեցավ «Հայ ռազմագերիների, այլ գերիների և տեղահանվածների վերաբերյալ» քննարկումը:
Առաջին բանախոս Ալան Միլոնն իր խոսքում նշեց, որ տարվա սկզբին Ֆրանսիայի պատվիրակությունը հանդիպել է Հայաստանի ու Ադրբեջանի դեսպաններին Ֆրանսիայի Սենատում՝ կենտրոնանալով ԵԽ անդամ երկու երկրների միջև հակամարտության, հետևանքների վրա։
«Իմ նպատակը չէ այստեղ վերջնական ու խաղաղ ձևով լուծել Հայաստանի ու Ադրբեջանի միջև անհամաձայնությունները, եթե անգամ ես շատ ուրախ կլինեի, եթե այդպես լիներ։ Գիտեմ, որ կան այլ առավել կոմպետենտ կառույցներ, երբ խոսքը հակամարտությունների լուծման մասին է, նկատի ունեմ ԵԱՀԿ Մինսկի խմբին, սակայն մեր պատասխանատվությունն է հստակորեն հասցեագրել գերիների, ռազմագերիների ու տեղահանվածների հարցերը»,- ասաց Ալան Միլոնը։
Նա անդրադարձավ ՄԻԵԴ-ի կողմից ընդունված միջանկյալ միջոցների մասին, որը երկու կողմերին կոչ էր անում ձեռնպահ մնալ գործողություններից, որոնք կարող են հանգեցնել Կոնվենցիայով նախատեսված իրավունքների խախտման։
Ասվեց, որ քաղաքացիական անձինք ևս թիրախավորվել են, եղել են քաղաքացիական զոհեր հայկական ու ադրբեջանական կողմերից, ադրբեջանական կողմը խոշտանգել է հայ զինվորներին, որոնց մասին տեսանյութեր են հայտնվել համացանցում։ Խոսեց HRW-ի զեկույցներից, նշելով, որ ռազմագերիները պաշտպանված են Ժնևի կոնվենցիայով։ Վկայալոչելով նոյեմբերի 9-ի հայտարարությունը, ընդգծվեց, որ այն անդրադառնում է գերիների հարցին, կողմերի միջև տեղի է ունեցել գերիների փոխանակում, սակայն խնդիրն ամբողջությամբ չի լուծվել, և ՄԻԵԴ-ը շարունակել է ստանալ հայտեր այս հարցով։
Բանախոսը նշեց, որ Ադրբեջանը անհրաժեշտ տեղեկություններ չի տրամադրել ՄԻԵԴ-ին գերիների հարցով ու ՄԻԵԴ-ը ստիպված է եղել ԵԽ նախարարների կոմիտեին տեղեկացնել այս մասին։ Միլոնը նշեց նաև հայ որոշ քաղաքացիների գերեվարման մասին, այդ թվում նաև Լիբանանից, որոնց Ադրբեջանը ներկայացնում է որպես վարձկաններ։ Ըստ նրա՝ 249 հայերից 72-ը մնում են Ադրբեջանում, որոնց ձերբակալումը հաստատվել է Ադրբեջանի կառավարության կողմից։ Ինչ վերաբերում է մյուս անձանց, Ադրբեջանի կառավարությունն ասել է, որ չի նույնականացրել նրանց։
«Ադրբեջանի կառավարությունը պետք է առավել ճշգրիտ պատասխանի ՄԻԵԴ հարցումներին ու ամբողջությամբ պահպանի եվրոպական միջազգային օրենքն ու ազատ արձակի հայ ռազմագերիներին։ Ես լսել եմ հայտարարություններ, որոնք հայ զինվորներին ասում են ահաբեկիչներ, տեսել եմ ռազմավարի այգին, որը բացվեց Բաքվում։ Ցավոք, այս ամենը դժվար թե արագացնի հաշտեցումը։ Այսօր մենք պետք է պաշտպանենք ռազմագերիների, գերեվարվածների ու անհայտ կորածների իրավունքները։ Եկեք չմոռանանք, որ այս թվերի ետևում մարդիկ են»,- ասաց Ալան Միլոնը։
Լրահոս
Տեսանյութեր
Խայտառակություն Թումանյան փողոցում. Չախոյան
