Ձեր վստահելի աղբյուրը

«Շաբաթ օրը «Կիլիկիա» ավտոկայանից արցախցիներից ահազանգ ստացա, որ ավտոկայանից Արցախ տեղափոխող ավտոբուսները պարբերաբար չեն կատարում իրենց պարտականությունները, և անընդհատ խնդիրներ է առաջանում»,- Երևանի ավագանու նիստում հայտարարեց «Բարգավաճ Հայաստան» խմբակցության ավագանու անդամ Հռիփսիմե Առաքելյանը:

Նա տեղեկացրեց, որ վերջին մի քանի շաբաթվա ընթացքում բավականին վատ է կազմակերպվում ուղևորափոխադրման աշխատանքը, և արցախցիների մոտ խնդիր է առաջանում:
Ըստ Առաքելյանի՝ Արցախ մեկնելու նպատակով  քաղաքացիները ժամը 6-ին գալիս են, և տեղեկանում, որ ավտոբուսը 7-ին  է շարժվելու, հետո ասում են, որ 8-ին կլինի և արդյունքում այդ մարդիկ մասնավոր երթուղայիններով են գնում՝ վճարելով դրա համար:

Փոխքաղաքապետ Հրաչյա Սարգսյանը արձագանքեց, որ վերջին երկու ամսում երկու ավտոբուս է մեկնում Արցախ և այնտեղ մեկնող մարդիկ խնդիրներ չեն ունեցել:Նրա խոսքով՝ քաղաքապետարանը կառավարությունից ստանում է գումար և այն փոխանցում տեղափոխող կազմակերպությանը և կարծիք հայտնեց, որ տեղափոխող կազմակերպությունը դեմ չի լինի հավելյալ ավտոբուսներով ուղևորափոխադրում իրականացնել:

Քաղաքապետ Հայկ Մարությանը էլ շեշտեց, որ մշտապես կապի մեջ է Հայաստանում Արցախի Հանրապետության ներկայացուցչության հետ, այնտեղից նման ազդակ չի ստացել:

«Եթե ունեք տվյալներ, փոխանցեք, գնանք այդ դեպքի հետևից, հասկանանք՝ ի՞նչ է եղել»,- հայտարարեց  քաղաքապետը:

Հռիփսիմե Առաքելյանը հավաստիացրեց, որ շաբաթ օրը միջադեպ է գրանցվել, և մեկ ավտոբուս ժամանակից շուտ գալով, քիչ ուղևոր է տարել Արցախ, իսկ երկրորդ ավտոբուսն ընդհանրապես չի եկել, և մարդիկ վճարովի հիմունքներով են տեղափոխվել: