Ապագան լուսավոր է, և այդտեղ տեղ չունեն Փաշինյանն ու իր թիմը. Գորգիսյան
«Այո՛, Հայաստանն ու Արցախն ունեն ապագա, այդ ապագան լուսավոր է, և այդտեղ տեղ չունեն Փաշինյանն ու իր թիմը»,- այսօր խորհրդարանական ճեպազրույցի ժամանակ ասաց ԱԺ «Լուսավոր Հայաստան» խմբակցության պատգամավոր Գևորգ Գորգիսյանը։
Պատգամավորի խոսքով, ցանկացած սխալ շտկելու համար մարդ պետք է գիտակցի, որ սխալվել է, իսկ Փաշինյանն ու իր թիմը չունեն այդ գիտակցումը, որ իրենք սխալ են արել, կամ ինչ-որ բանում մեղավոր ու պատասխանատու են, հետևաբար, իշխանության մնալու որևէ պարագայում նրանք շարունակելու են քանդել։
«Երեք տարի իշխանության լինելով հանդերձ՝ նրանք որևէ բան չեն կառուցել, որևէ ոլորտ չկա, որ ռեֆորմ արված լինի։ Հետևաբար, նրանց՝ իշխանության մնալը չի բխում հայության շահերից, և տանելու է իրավիճակի ավելի վատացման»,- ասաց նա։
Հարցին, թե ինչը կարող է լինել պատճառը, որ Նիկոլ Փաշինյանը Արցախ չի գնում, ԼՀԿ-ական պատգամավորն անկեղծացավ. «Կուզեի ասել, որ ամաչում է, բայց, ճանաչելով Փաշինյանին, գիտեմ, որ չի ամաչում»։
Անդրադառնալով Արցախի ԱԻՊԾ տնօրենի տեղակալի պաշտոնանկությանը, որը կապված էր ՀՀ ԱԺ-ում նրա հայտարարությունների հետ, որոնք ուղղված էին նաև իմքայլական պագամավորներին՝ Գևորգ Գորգիսյանն ասաց, որ դա այլևս օրինաչափ է։
«Մեր մոտ որևէ նշանակում կամ ազատում չի արվում՝ ելնելով խնդիրներից ու մարտահրավերներից, ամեն ինչ արվում է մի մարդու քմահաճույքներով՝ ելնելով կուսակցական շահերից։ Ես չեմ զարմանում։ Քաղաքական չեզոքության խախտում գուցե կար ԱԻՊԾ փոխտնօրենի խոսքում, բայց դա կարելի՞ է դիտարկել պաշտոնեական դիրքի չարաշահում»,- նշեց նա։
Դիտարկմանը, որ ԲՀԿ առաջնորդ Գագիկ Ծառուկյանին անձեռնմխելիության հարցի քննարկման ժամանակ Նիկոլ Փաշինյանը հայտարարեց, որ ԲՀԿ-ն ինքնաոչնչացվել է, բայց այս օրերին ԱԺ փոխխոսնակ Ալեն Սիմոնյանը հայարարում է, որ ԲՀԿ-ն ծանրակշիռ ձայներ է հավաքելու և լուրջ դեր է ունենալու այս ընտրություններում, Գևորգ Գորգիսյանն արձագանքեց՝ ասելով՝ զարմանում է, որ դեռ մարդիկ զարմանում են իշխանության մոտեցումների անընդմեջ փոփոխություններից։
«Նախ Գագիկ Ծառուկյանը օլիգարխ էր, հետո դարձավ խոշոր սեփականատեր,հետո դարձավ ընտրակեղծարար, հետո դարձավ երկրորդ քաղաքական ուժը, ապա արդեն՝ խոշոր քաղաքական ուժ...։ Ես այլևս չեմ զարմանում, երևի իրենք ինչ-որ հաշվարկներ ունենմ, իրենք գործում են միայն իրենց քաղաքական թիմի շահերից ելնելով։ Նրանց որևէ քայլ որևէ աղերս չունի ՀՀ շահերի հետ, և իրենց քայլերում պետք է անձնական ու կուսակցական շարժառիթներ փնտրել»,- ասաց նա։
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
