Ձեր վստահելի աղբյուրը

«Այսօր Փաշինյանը հերթական փորձն էր անում ցույց տալու, որ Հայաստանում  կարող է շրջել։ Բայց ի պատիվ սյունեցիների՝ արգելեցին մուտքը, անպատվեցին,  հետապնդեցին, հերթական անգամ ապացուցելով, որ դավաճանը մեր երկրում տեղ չունի, պետք է հեռանա»,- կառավարական ամառանոցի մուտքի մոտ լրագրողների հետ զրույցում ասաց ՀՅԴ ԳՄ ներկայացոիցիչ», Հայրենիքի փրկության շարժման համակարգող Իշխան Սաղաթելյանը։

Նա նշեց, որ հավաքվել են այստեղ՝ իրենց աջակցությունը հայտնելու սյունեցիներին, զգուշացնելու, հասկացնելու Փաշինյանին, ով այսօր հերթական անգամ ապօրինի հրահանգ էր տալիս ուժային կառույցներին, որ  հանկարծ չշփոթի ու հատուկ գործողություններ անի, եթե որևէ սյունեցու գլխից  մազ պակասի, փորձեն ձերբակալեն, հետապնդեն, պատասխանը ստանալու են շատ կոշտ և խիստ։

Պատասխանելով հարցին, թե հնարավո՞ր է իշխանությունը խուսափի արտահերթ ընտրություններից,  Ի. Սաղաթելյանն ասաց. «Մենք առաջին օրվանից ասել ենք, որ այս մարդն ամեն վայրկյան կարող է խուսափել ընտրություններից, իր որևէ  հայտարարություն մեզ համար հիմք չէ։ Իհարկե, հնարավոր է  ընտրություններ չլինեն, եթե այդ ճանապարհով գնան, ավելի լավ։ Մենք ասել ենք՝ լինի ընտրությունով, թե առանց ընտրության, այս դավաճան սրիկային պետք է հեռացնենք»։

Հարցին՝ եթե  կայանան ընտրություններ,  ՀՅԴ արդեն որոշում ունի՞, թե ինչ  ձևաչափով է  մասնակցելու, խոսակցություններ կան, որ ՀՀ երկրորդ նախագահ Ռոբերտ Քոչարյանը  պետք է գլխավորի  ցուցակը,  ՀՅԴ ԳՄ ներկայացուցիչն ասաց. «Մենք ասել ենք, որ եթե ընտրություններ լինեն, մասնակցելու ենք, դա ևս դիտարկելու ենք իրեն հեռացնելու ճանապարհ։ Իսկ ինչ ձևաչափով, ոնց, կհայտարարվի դրա մասին, մանրամասները կխոսենք»։

Ի. Սաղաթելյանը նշեց, որ Փաշինյանն է ճգնաժամ ստեղծողը,  ինքն է երկիրը բերել ու հասցրել այս աղետին։

«Երկրում համատարած բարդակ է, կներեք բառիս համար։ Որքան մնա իշխանության, այս քաոսն ավելի է խորանալու ի վնաս մեր պետության, ժողովրդի, պետականության։ Օր առաջ հեռանալը բխում է մեր երկրի շահերից»,- ասաց Ի. Սաղաթելյանը։