Ձեր վստահելի աղբյուրը

2020 թվականի հուլիսին Պետական անվտանգության ծառայության կողմից ձերբակալված թալիշ բլոգերին Բաքվի դատարանը դատապարտել է 7 տարվա ազատազրկման՝ «ազգային ատելություն հրահրելու» համար, ի թիվս այլ մեղադրանքների:

Ասլան Գուրբանովը մեղավոր է ճանաչվել ապրիլի 15-ին` պետության դեմ հանրայնորեն ապստամբելու, լրատվամիջոցներով ազգային, ռասայական, սոցիալական, կրոնական ատելության և թշնամանքի հրահրման մեջ:

Բլոգերը մեղադրվում էր սոցիալական կայքերով, ինչպիսիք են Facebook-ը և Instagram-ը, հակապետական քարոզչություն իրականացնելու, խտրական նյութեր տարածելու և թալիշների իրավունքները ոտնահարելու մեջ՝ հրապարակելով նյութեր, որոնք «կեղծ պնդումներ են», որ թալիշները խտրականության են ենթարկվել։

2020-ի սեպտեմբերին բլոգերի եղբայրը՝ Սաքիթ Գուրբանովը, «Ազատություն» ռադիոկայանին ասել էր, որ իր եղբայրը բուժում է ստանում հիվանդանոցում շուրջ 15 օր: Սակայն ընտանիքը երբեք ոչ մի լուր չի ստացել նրա ախտորոշման կամ հոսպիտալացման պատճառի վերաբերյալ:

Սաքիթ Գուրբանովը OC Media-ին ասել է, որ 2020 թվականի հուլիսի 14-ին եղբոր ձերբակալությունից հետո իրենք միայն մեկ անգամ են հնարավորություն ունեցել նրան տեսնելու՝ փետրվարի 8-ին, Պետական անվտանգության ծառայության շենքում:

«Նա մեզ ասաց, որ անվտանգության ծառայությունից ինչ-որ մեկն իրեն ասել է. «Ես կհամոզվեմ, որ դու ստանաս 10 տարվա ազատազրկում, որպեսզի այն դաս լինի բոլոր թալիշներին: Թող մնան նրանք, ովքեր ցանկանում են ապրել այս երկրում, նրանք, ովքեր չեն սիրում այն, կարող են հեռանալ»»,-պատմել է եղբայրը:

Ընտանիքի խոսքով՝ Ասլան Գուրբանովը սրտի հետ կապված խնդիրներ ունի, տառապում է էպիլեպսիայով:

Ադրբեջանում և արտերկրում գտնվող թալիշական մի շարք ակտիվիստներ հանդես են եկել Գուրբանովի պաշտպանությամբ:

«Նրա դեմ առաջադրված գլխավոր մեղադրանքներից մեկն այն էր, որ նա Թալիշի դրոշով լուսանկարվել է Բաքվի պուրակում և դրոշը պահել տանը։ Ադրբեջանի կառավարությունը արմատական դիրքորոշում է որդեգրել թալիշների դեմ և մտադիր չէ փոխզիջման գնալ», - OC Media- ին ասել է Ռուսաստանի Թալիշների դաշնային մշակութային ինքնավարության նախագահ Իսմայիլ Շաբանովը:

Շաբանովը չի հավատում, որ իրավիճակը կփոխվի, քանի դեռ աշխարհի առաջատար երկրները չեն ճնշել Ադրբեջանին:

«Բայց մենք՝ թալիշներս, պայքարում ենք և շարունակելու ենք պայքարել մեր ուժերի սահմաններում»,- ասել է Շաբանովը:

Ադրբեջանցի լրագրող, իրավապաշտպան, Ադրբեջանում Թալիշների հասարակական խորհրդի (PCTA) համանախագահ Հիլալ Մամեդովը OC Media-ին ասել է, որ վստահ է, որ Գուրբանովին առաջադրված մեղադրանքները սարքված են:

«Դա միջոց է թալիշ ակտիվիստներին վախեցնելու և նրանց իրավունքները ոտնահարելու համար: Ասլանը հայտնի թալիշական ակտիվիստ չէր: Նա պարզապես սովորական բլոգեր էր և օրենքի շրջանակներում խթանում էր թալիշների պատմությունն ու մշակույթը»,- ասել է նա։