Ձեր վստահելի աղբյուրը

«Իշխանությունը և հատկապես առանձին ներկայացուցիչներ գտնվում են  խորը պատրանքների մեջ իրենց վարկանիշի հետ կապված և  ընտրությունների արդյունքների մասին կարելի է դատել միայն երբ լինեն ընտրություններ  և լինեն արդյունքներ»,- կառավարական ամառանոցի մուտքի մոտ լրագրողների հետ զրույցում ասաց քաղաքագետ Արմեն Մինասյանը։

Ինչ վերաբերում է  Սյունքիում այսօր տեղի ունեցած միջադեպերին՝ կապված Փաշինյանի այցի հետ, քաղաքագետը նշեց, որ պետք է հասկանալ՝ Սյունիքը մեր անվտանգության այլևս առաջնագիծն է, սյունեցիները սեփական մաշկի վրա զգում են  այն ամբողջ  անօրինությունը, սպառնալիքները, մարտահրավերները, սկսած կենցաղից, օրինակ Շուռնուխում մարդիկ սեփականության, գույքի հետ կապված խնդիրներ ունեն, չկա պետությունը, որը պաշտպանի, վերջացրած նրանով, որ  կան մտահոգություններ  միջանցքի հետ կապված, կարող է անմիջական սպառնալիք լինել նույնիսկ մարդկանց ֆիզիկական անվտանգությանը։

Խոսելով արդեն Սյունիքում արձանագրված դեպքերից հետ հարուցված քրեական գործերի մասին, Արմեն Մինասյանն ասաց, որ Նիկոլ Փաշինյանի իշխանությունը, Փաշինյանը հասարակության խնդիրներին արձագանքելու այլ եղանակ չունեն, քան իրավապահ մարմինը, այսինքն ուժային հարկադրանքի գործիքը  կիրառելը և ակնհայտ է, որ մարդկանց, պարզապես գուցե մի քիչ սպեցիֆիկ լեքսիկոնով  բողոքի ակցիային արձագանքեցին քրեական գործերով։ Ըստ նրա, Փաշինյանի համար առաջնային տեղ ունի սեփական թիմակիցներին ցույց տալ, որ նույնիսկ խնդիր չունի այդ միջավայր մուտք գործելուց,  բայց հավանաբար  չէր պատկերացում, որ արձագանքը կլիներ այդպիսին։

«Այսինքն այսօր ունենք իրավիճակ, որ Փաշինյանը ոստիկանական պատնեշի ներքո է Հայաստանի տարածքում երթևեկում,  սեփական երկրում երկրի ղեկավարը երթևեկում է ոստիկանական պատնեշների արանքով»,- ասաց քաղաքագետ Արմեն Մինասյանը։