Ձեր վստահելի աղբյուրը

«Այն տեսանյութերում, որոնք տարածվում են, ակնհայտ ու ակնառու են սյունեցիների նկատմամբ խոշտանգումները»,- այսօր հրավիրված մամուլի ասուլիսի ընթացքում ասաց ադրբեջանագետ Անժելա Էլիբեգովան։

Նրա խոսքով, այսօր երևում է երեկ Կապանում հնչած մտքերի արդյունքը, թե իրավապահ համակարգի ներկայացուցիչները պետք է ավելի կոշտ ձևով սյունեցիներին ձերբակալեն։

«Եվ փաստորեն, իրավապահ համակարգը խամաճիկի պես հակաօրինական գործողություններ է իրականացնում։ Եվ ամբողջ ազգը ականատես է լինում, որ ինչ է Փաշինյանին լավ չեն դիմավորել, նրա քմահաճույքով իրավապահ համակարգը վրեժ է լուծում։ Փաստացի մենք ունենք իրավիճակ, երբ Ալիևը և Նիկոլը զուգահեռ ու նույն գործելաոճն են որդեգրել։ Հիմա սյունեցին ստիպված է պայքարել երկու ֆրոնտով՝ իրեն և՛ թիկունքից են հարվածում, և՛ թշնամին է հարվածում։ Այդ մարդիկ երկու կողմից ինքնապաշտպանության խնդիր ունեն»,- ասաց նա։

Ըստ ադրբեջանագետի, նոր պատերազմի վախերի ու սպառնալիքի ներքո հայկական կողմին հերթական անգամ ստիպում են գնալ զիջումների, և զավեշտալի է, որ այդ նույն սպառնալիքներն է հնչեցնում Նիկոլ Փաշինյանը՝ խոսելով կոմունիկացիաների բացման մասին։

«Նա դրդում է հրաժարվել որևէ բանակցությունից, ինքնապաշտպանությունից։ Ես չունեմ վստահություն, որ Սյունիքում այդ ճանապարհը չի բացվի։ Ալիևը հասկանում է, որ հիմա, քանի դեռ Հայաստանում իշխանություն չի փոխվել, շատ հեշտ է հայկական կողմին ստիպել, որ նա գնա զիջումների։ Դրա հետ մեկտեղ կա նաև գերիների հարց, որը կարող է անընդհատ շահարկել։ Ու Սյունիքով ճանապարհի ստեղծումը եթե հայկական կողմը դիտարկում է որպես  կոմունիկացիաների բացում, ապա ադրբեջանական կողմը պնդում է, որ դա միջանցք է»,- ասաց նա։

Անժելա Էլիբեգովան ընդգծեց, եթե միջանցք է, ապա դա Ադրբեջանի սուվերեն ճանապարհն է, որն անցնելու է հայկական տարածքով, իսկ կոմունիկացիաներից օգտվել նշանակում է, որ ուղղակի օգտվելու են մեր ճանապարհներից, մեր հաշվին ու մեր տարածքով։

«Բայց այս հարցը՝ միջա՞նցք է լինելու, թե՞՝ ուղղակի կոմունիկացիաների բացում, դեռ պատասխան չի ստացել։ Իսկ երբ այս իշխանությունը վախենում ու խուսափում է պատասխանել հարցերի, հետո մենք տեսնում ենք, որ պատասխանը մեզ համար նպաստավոր չէ, թաքուն ինչ-որ պայմանավորվածություններ են ձեռք բերվել»,- նշեց նա։

Ադրբեջանագետը հայտնեց նաև, որ այս տարվա ռազմական բյուջեն Ադրբեջանը զգալիորեն՝ մոտ 30 տոկոսով ավելացրել է, անընդհատ Թուրքիայի հետ զորավարժություններ է անցկացնում։

«Բնական է, որ իրենք նոր ռազմական գործողությունների են պատրաստվում և ներդաշնակեցման պրոցես է գնում։ Պարզ է, որ նրա համար մեկ թշնամին մենք ենք։ Դեպքերի զարգացումը կարող է նաև անդրադառնա այստեղ։ Արդյո՞ք մենք դրան պատրաստ ենք, ակնհայտ է, որ ոչ։ Ադրբեջանցիները կրակում են գյուղացիների տների վրա, իսկ ՊԲ-ն հորդորում է զերծ մնալ ցանկացած լարումից»,- ասաց նա։