Ձեր վստահելի աղբյուրը

Գործադիրը քննարկում է Արցախի կառավարությանն աջակցություն տրամադրելու վերաբերյալ համաձայնագրին հավանաություն տալու հարցը։

ՀՀ աշխատանքի և սոցիալական հարցերի նախարար Մեսրոպ Առաքելյանի խոսքով, համաձայնագրով նախատեսվում է 10 տարվա ընթացքում յուրաքանչյուր տարում լրացուցիչ 10 միլիարդ դրամի հատկացում իրականացնել Արցախի Հանրապետությանը, որը կծախսվի պատերազմի հետևանքով գույքային վնաս կրած ֆիզիկական և իրավաբանական անձանց աջակցություն տրամադրելու համար։

«Մասնավորապես, նախատեսվում է գույքային վնասի փոխհատուցում իրականացնել ֆիզիկական և իրավաբանական անձանց։ Բնակարանների փոխհատուցումն այս ծրագրում ներառված է։ Տրամադրվող գումարից աջակցություն կստանան այն քաղաքացիներն և իրավաբանական անձինք, որոնք պատերազմի հետևանքով կորցրել են հասարակական և արտադրական նշանակություն ունեցող շենք-շինություն, մարդատար և բեռնատար մեքենաներ, գյուղատնտեսական, շինարարական և այլ տեխնիկա, ձեռնարկատիրական գործունեության մեջ ներառված միջոցներ, կաթնամսատու կենդանիներ, մեղվաընտանիքներ, պտղատու և խաղողի այգիներ»,- ներկայացրեց նա։

Մեսրոպ Առաքելյանը նշեց, որ համաձայն որոշման՝ մինչև 5 միլիոն դրամ աջակցությունը տրամադրվելու է միանվագ, իսկ դրանից ավելիի դեպքում՝ մուրհակի տեսքով, որը հնարավորություն է տալու Արցախում գործարար ծրագրեր իրականացնել և միևնույն ժամանակ այդ մուրհակը եկամտաբերություն կապահովի՝ տարեկան 10 տոկոսի չափով։

Բացի այդ պատերազմի հետևանքով Արցախի վերահսկողությունից դուրս գտնվող տարածքներում նախկինում բնակվող քաղաքացիների, ֆիզիկական անձանց վարկային պարտավորությունների ամբողջական փոխհատուցում է նախատեսվում, իսկ իրավաբանական անձանց դեպքում կփոխհատուցվի վարկային պարտավորությունների մինչև հիսուն տոկոսը։

«Ինչպես նաև առաջիկա 3 տարիներին Արցախի Հանրապետությունում մշտապես բնակվող ֆիզիկական անձանց հիփոթեքային, գյուղատջնտեսական և փոքր ձեռնարկատիրական գործունեության վարկերի մասով մասնակի կամ ամբողջական փոխհատուցում է նախատեսվում։ Ընդհանուր առմամբ, այս և արդեն իրականացված ծրագրերով պատերազմի հետևանքով ֆիզիկական և իրավաբանական անձանց գույքային կորուստների փոխհատուցումը ամբողջությամբ իրականացվում է»,- նկտաեց նա։

Մեսրոպ Առաքելյանի խոսքով, այս պահին բնակելի տների շինարարության հետ կապված երեք մասով աշխատանքներ են իրականացվում։ Մասնավորապես, գյուղական համայնքներում նախկինում կիսակառույց տների շինարարական աշխատանքներ են ընթանում, դրա շնորհիվ այս պահին Արցախի վերահսկողությունից դուրս մնացած տարածքներից մինչև 300 ընտանիք արդեն վերադարձել է Արցախ, և այդ գյուղական համայնքների նոր տներում բնակություն է հաստատել։

Նա նկատեց՝ Ստեփանակերտում բազմաբնակարան շենքերի կառուցման աշխատանքներ են ընթանում, ևս մի քանի քաղաքային բնակավայրերում մոտ մեկ ամսից կսկսվեն շինարարական աշխատանքները։