Ձեր վստահելի աղբյուրը

«Չէ, դեռ չեն հասել, երևի Թասի ոլորաններում են: Եթե եղբորս հասել են, ինչո՞ւ ինձ չպետք է հասնեն: Եթե ամեն դեպքում ավագանու անդամի հետևից գնում են, վարչական ղեկավարի հետևից ինչո՞ւ չպետք է գնան»,- Panorama.am-ի հետ զրույցում ասաց  Գորիս խոշորացված համայնքի Շուռնուխ վարչական շրջանի ղեկավար Հակոբ Արշակյանը:

Նա նշեց, որ եղբայրը՝ Արարատ Աղաբեկյանը, բոլորին հայտնի  Աշխարհապետը, չի մասնակցել Փաշինյանի դեմ տեղի ունեցած երեկվա ակցիաներին, 10 օր է հիվանդ պառկած է, սրսկվում է, 39 աստիճան տաքություն ունի:

«Բերման են ենթարկել առանց որևէ պատճառաբանության: Ոչ մի բան չեն ասել, թե ինչու են տանում, ուր են տանում, չգիտեմ էլ՝ ուր են տարել»,- ասաց Հ. Արշակյանը:

Նա հայտնեց, որ գյուղից այլ բերման ենթարկվածներ չկան:

Հակոբ Արշակյանն ասաց, որ Նիկոլ Փաշինյանի՝ ապրիլի 20-ի երեկոյան Շուռնուխ այցից հետո, շուռնուխցիները նեղսրտած են, որ չեն կարողացել հանդիպել նրան. «Ամեն մեկն իր ասելիքն ունի, թեկուզ անվտանգության առումով: Երբ գոռում է, ասում է՝ Սյունիքն անվտանգ է, ցերեկով թող գար, կանգներ գյուղացու հետ, նայեր թուրքի ճակատին ու ասեր՝ անվտանգ է, մեզ հո չի՞ կծում: Թող այդքանն աներ»:

Փաշինյանը չի հանդիպել նաև հենց գյուղապետի հետ:

«Ա, ես ով եմ նրա համար, գիշերը գալիս է, իմ մոտով անցնում, գնում է, տոպրակներով վազում է  սրա, նրա տուն: Ես նրան պե՞տք եմ: Ես նախկին եմ, սև եմ, թե կորիչնիվի, չգիտեմ, բայց նախկին եմ»,- ասաց Շուռնուխ վարչական շրջանի ղեկավար Հակոբ Արշակյանը: