Ձեր վստահելի աղբյուրը

Բայդենի վարչակարգում ԱՄՆ Միջազգային զարգացման գործակալության (USAID) ղեկավարի պաշտոնում առաջադրված, ՄԱԿ-ում 2013-17թթ-ներին ԱՄՆ նախկին դեսպան Սամանտա Փաուերը, ԱՄՆ նախագահ Ջո Բայդենի կողմից Հայոց ցեղասպանության պաշտոնական ճանաչումից հետո, թվիթերում մի շարք գրառումներ է կատարել, ինչպես ինքն է գրել․ «Կիսվում եմ անձնական մտորումներով՝ Բայդենի անսահման հուզիչ այս որոշման հետ կապված՝ վերջապես ճանաչել Հայկական ցեղասպանությունը»։

«Քառորդ դար առաջ ես սկսեցի ուսումնասիրել 20-րդ դարի հիմնական ցեղասպանությունները: Իմ ուսումնասիրությունը, բնականաբար, սկսվեց օսմանյան սպանդից և ես հայտնաբերեցի, թե ինչպես է Ռաֆայել Լեմկինը հորինել «ցեղասպանություն» բառը 1944 թ-ին` հայերի ոչնչացումն ունենալով մտքում»,- գրել է Փաուերը:

Ըստ նրա՝ ինքը սկսել է ծանոթանալ հայկական սփյուռքի տպավորիչ նվաճումների հետ։

«Իհարկե այն, ինչ ամենաշատն էին ցանկանում ամերիկահայերն այն էր, որ Սպիտակ տունը ճանաչեր ցեղասպանությունը: Երբ ես աշխատում էի Օբամայի մոտ Սենատում 2005 թ-ին, նա մի հզոր նամակ գրեց պետքարտուղար Ռայսին` կոչ անելով Բուշի վարչակազմին՝ ճանաչել: Երբ Օբաման այն ժամանակ առաջադրվեց նախագահի պաշտոնում, նա խոստացավ ճանաչել:

Բայց ինչպես շատ է քննարկվել, Օբաման չկատարեց այս խոստումը: Իմ հուշագրության «Ապրիլի 24-ը» գլխում նկարագրում եմ նրա հիմնավորումները (մտավախություններ Իրաքից զորքերի դուրսբերումը բարդացնելու, Հայաստան-Թուրքիա խաղաղության գործընթացը խափանելու մասին և այլն):

Ամերիկահայերը կոտրվեցին:

Ճանաչման համար պայքարելով՝ ես ցնցվեցի այդ որոշումից, և մի քանի շաբաթ շուտ ծննդաբերեցի, ու իմ որդին՝ Դեկլանը, ծնվեց ապրիլի 24-ին՝  Հայոց ցեղասպանության հիշատակման օրը։ Նա այսօր դարձավ 12 տարեկան»,- գրում է Փաուերը։

Ըստ Փաուերի՝ հաջորդ շանսը Օբամայի կողմից ճանաչման համար, ինչպես ինքն էր կարծում, պետք է լիներ 2015-ին՝ Հայոց ցեղասպանության 100-րդ տարելիցին, երբ Հռոմի պապը ճանաչեց այն։

«Սակայն ԴԱԵՇ-ի դեմ պատերազմի շարունակմամբ, Պենտագոնն անհանգստացավ թուրքական բազաներ մուտքը կորցնելու կապակցությամբ: Այնուհետ ես ու այդ ժամանակ ԱՄՆ փոխնախագահ Ջո Բայդենը ներկա էինք Վաշինգտոնի տաճարում անցկացվող պատարագին: Այդ գիշեր Բայդենն ինձ ասաց, որ եթե ինքը երբևէ լինի այդ դիրքում (ԱՄՆ նախագահ․-խմբ․), ինքը կճանաչի Հայոց ցեղասպանությունը։

Այսօր, որպես Միացյալ Նահանգների Նախագահ, նա արեց հենց դա»,- գրել է Փաուերը: