Ձեր վստահելի աղբյուրը

«Հայոց եղեռնի հիշատակի այս օրը մենք ձեզ հետ ենք։ Ազատություն բառը՝ լիբերտա, աշխարհի լավագույն բառերից մեկն է. դա մարդու՝ սեփական կամքով գործելու կարողությունն է»,- այսօր Հայոց ցեղասպանության 106-րդ տարելիցին նվիրված արարողության ժամանակ ասաց Կենտրոնամերիկյան խորհրդարանի նախագահ Կարոլինա Ֆերնանդեսը։

Նրա խոսքով, ազգերն ու ժողովուրդները բավականին թանկ գին են վճարել ազատության համար, և դա նրանց համար արժեցել է մարդկային կյանքեր՝ բերելով ցավ ու տառապանք։

«Ֆրանսիական հեղափոխությունից հայտնի՝ դեպի ազատություն ոգեկոչող նկարը բավականին մեծ արժեք ունի, քանի որ հնարավորություն է տվել ծածանել եռագույն դրոշը, որի արդյունքում ձեռք է բերվել ազատություն, չնայած դա եղել է մահվան ու արյան գնով։ Հայաստանը, ինչպես Կենտրոնական Ամերիկան, բավականին մեծ գին է վճարել ազատության համար, մեր դեպքում դա արժեցել է հազարավոր մարդկանց կայնքեր, որոնք սպանվել են քաղաքացիական պատերազմի պարագայում, մինչդեռ Հայաստանում միլիոնավոր մարդիկ մահացել են, որպեսզի կարողանան պահպանել իրենց հազարամյա մշակույթը, իրենց լեզուն, կրոնը»,- ընդգծեց նա։

Ըստ Կարոլինա Ֆերնանդեսի, ինչպես Կենտրոնական Ամերիկան, այնպես էլ Հայաստանն ունեցել են առավելություններով հարուստ աշխարհագրական դիրք, որը մյուս պետությունների մեջ առաջացրել է որոշակի նախանձ, այդ իսկ պատճառով երկու դեպքում էլ շատ թանկ գին է վճարվել ազատության համար։

«Կենտրոնամերիկյան խորհրդարանի անունից մեկի րոպե լռությամբ հարգում ենք զոհերի հիշատակը, և ցանկանում ենք, որպեսզի վերականգնվի արդարությունն ու խաղաղությունը»,- եզրափակեց խոսքը նա։