Ձեր վստահելի աղբյուրը

«Հայոց ցեղասպանության նահատակները մնում են մեր խղճին ու ապրում մեր կյանքում, այսօր և մեր ապագայում»,- այսօր Հայոց ցեղասպանության 106-րդ տարելիցին նվիրված արարողության ժամանակ ասաց Լիբանանի Հանրապետության նախագահ Միշել Աունի ներկայացուցիչ Վարդինե Օհանյանը:

Ըստ նրա, նահատակները ավելի քան մեկ դար անց, վերանորոգում են երկրի երեսը։

«Նրանք հայտարարում են, որ Աստված կոչվում է խաղաղության աստված, այլ ոչ թե անարդարության, գաղութատիրության և բռնության աստված: Նրանց հետ մենք մերժում ենք անձնատուր լինելը մահվան դատավճռին: Նրանք նահատակվեցին, բայց շարունակեցին խոսել հոգով։ Հայ և լիբանանցի ժողովուրդների միջև մեկից ավելի ընդհանուր հայտարար կա՝ հատկապես տանջանքի, զոհաբերության ու տառապանքի մեջ: Դուք սրով եք սպանվել, մենք սպանվել ենք սովից ու շրջափակումից, իսկ հանցագործը մեկն է:

Այս ճանապարհին մենք միասնաբար, հանուն արդարության մերժում ենք կեղծիքը, ավերումն ու ճշմարտության քողարկումը: Այսօ՛ր, այսօ՛ր, կոչ ենք անում լինել միասին, այս է գործուն ճշմարտությունը, որի շնորհիվ մենք ազատագրվում ենք ամեն տեսակի վախից ու լինում առավել ուժեղ ամեն տեսակի ենթակայությունից»,- շեշտեց նա։

Վարդինե Օհանյանը նկատեց, որ լիբանանահայկական հարաբերություններն ամրապնդվել են հատկապես մարդկային մակարդակում, երբ անցյալ դարասկզբին՝ պատմության ցավալի ժամանակահատվածում, հարյուրհազարավոր հայեր, հայ ժողովրդի դեմ կազմակերպված ջարդերի թիրախ դառնալով, հաստատվեցին Լիբանանի հողերում:

«Այստեղից՝ այս պատմական վայրից ու այս պատմական պահից, եկեք այնպես անենք, որ աշխարհը զերծ մնա մեծամասնության ու փոքրամասնությունների գոյության մասին զգացումներից: Մենք բոլորս փոխկապված ենք, եղբայր ենք, որովհետև մենք միասին բախվում ենք ընդհանուր մարտահրավերների, և յուրաքանչյուրս իր ձևով է տուժում այդ հետևանքներից»,- եզրափակեց խոսքը նա։