Ձեր վստահելի աղբյուրը

«Նիկոլ Փաշինյանն իր հրաժարականի տեքստում ասում է՝ մենք քաղաքացուց ստացած իշխանությունը պետք է վերադարձնենք նրան։ Նախ դու ինչ-որ բան կարող ես վերադարձնե՞լ, դու մենակ խլող ես, չանթող տանող ես»,- այսօր հրավիրված մամուլի ասուլիսում ասաց ԱԺ անկախ պատգամավոր Գևորգ Պետրոսյանը:

Նա, դիմելով Նիկոլ Փաշինյանին, նշեց. «Ա՛յ դեմագոգ, եթե վերադարձնում ես իշխանությունը, ինչո՞ւ ես հընթացս ասում, որ ես նորից կարող եմ գալ, դառնալ վարչապետ: Ո՞ւմ ես հիմարի տեղ դրել: Այսինքն՝ հաթաթա է տալիս, որ եթե ձեզ խելոք չպահեք, նորից կգամ վարչապետ կդառնամ»:

Ըստ Գևորգ Պետրոսյանի, ցանկացած անձի հրաժարականի հիմքում ընկած է լինում երկու փաստ. կա՛մ առողջական վիճակն է անբավարար, կա՛մ նա ոլորտը ձախողել է:

«Եթե առողջական խնդիր ունես, ասա հասկանանք: Իսկ եթե հասկանում ես, որ ձախողել ես, ձախողած անձի վերադարձը ո՞րն է։ Նա ասում է՝ ես հրաժարական տվեցի, 2 շաբաթում վարչապետի թեկնածու չի առաջադրվի, կառաջադրվեմ միայն ես, չեմ ընտրվի և խորհրդարանը կցրվի: Այսինքն՝ նա թքած ունի խորհրդարանի վրա և էս գլխից գրիչով գծել է, թե ինչ է լինելու: Բա որ դու ավանտյուրա անես, և խորհրդարանը քեզ ընտրի: Փակվելու է ընտրությունների թեման: Եթե ինքը ԱԺ-ում ընտրվեց վարչապետ, մեխանիզմ չկա  ԱԺ-ի որոշումը վիճարկելու: Ես նրանից ամեն ինչ սպասում եմ: Ինքը կարա ասի՝ ես չեմ ընտրվում, բայց ներքին կարգով հրահանգ տա, ասի՝ ինձ ընտրեք»,- կարծիք հայնտեց Գևորգ Պետրոսյանը:

Նա նշեց, որ լավագույն տարբերակն այժմ Նիկոլ Փաշինյանի համար այն է, որ ինքը կանգնի ու կամովին ասի՝ ինձ դատեք։ Այդ դեպքում, ըստ պատգամավորի, մեղմացուցիչ հանգամանք կլինի։

Անդրադառնալով հարցին, թե Նիկոլ Փաշինյանը պե՞տք է մնա վարչապետի ժամանակավոր պաշտոնակատար՝ Գևորգ Պետրոսյանն ասաց, որ «այդ մարդը ստախոս է», քանի որ 2018-ին ինքն էր ասել, որ իրավաբանների հետ խորհրդակցել ու տեղեկացել է՝ հրաժարական տված վարչապետը չի կարող լինել վարչապետի ժամանակավոր պաշտոնակատար։

«ՀՀ Սահմանադրության 158-րդ հոդվածն ասում է, որ Կառավարության հրաժարականի դեպքում Կառավարության անդամները շարունակում են պաշտոնավարել, իսկ Սահմանադրության մեկ այլ նորմ էլ ասում է՝ Կառավարությունը բաղկացած է վարչապետից, փոխվարչապետերից և նախարարներից։ Սա դրանից է կառչում։ Այ տղա, գնա իրավաբան գտի, թող քեզ իրավագիտության այբուբեն սովորեցնի։ Ես կոչ եմ անում ՀՀ գլխավոր դատախազ Արթուր Դավթյանին, որ եթե այս պահից Նիկոլ Փաշինյան ապիկարը, որևէ գործողությամբ միջամտեց Կառավարության գործունեությանը, ու եթե Նիկոլը հինգշաբթի օրը Կառավարության նիստ վարեց, դա պետք է ընդունել հիմք՝ իշխանության յուրացման հատկանիշներով քրեական գործ հարուցելու համար»,- նշեց նա։