Ձեր վստահելի աղբյուրը

«Ժողովուրդ ջան, հասկացեք, սյունեցիներն այդ ամեն ինչի անմիջական կրողներն են»,-լրագրողների հետ զրույցում հայտարարեց Քաջարանի քաղաքապետ Մանվել Փարամազյանը՝ մեկնաբանելով Սյունիքում Նիկոլ Փաշինյանին վիրավորանքներով, հայհոյանքներով ընդունելությանը։

Նրա խոսքով, սյունեցիների պահանջն է գտնել կարող ուժեր, որոնք կարող են գտնել լուծումներ այդ հետևանքները վերացնելու համար։

Անդրադառնալով լուրերին, թե Սյունիքի մարզում ռազմավարական նշանակության դիրքեր են հանձնվել հակառակորդին, Փարամազյանն ասաց՝ դեկտեմբերի 17-ին հայկական կողմը, պաշտպանության նախարարը, բարձրաստիճան սպաներ իրենց ժամանակ էին տվել, որ լքեն շահեկան դիրքերը։

«Մենք էլի չէին զիջի, եթե չհայտնվեինք անօգնական վիճակում։ Ստիպված էինք դա անել։ Կարող եմ ասել, որ այսօր թշնամին տիրապետումէ  ցանկացած շահեկան դիրքի։ Կարող եմ ասել, էս իշխանությունը մի հատ բոմբ է դրել Սյունյաց աշխարհի տալ, ՀՀ տակ։ Եթե կորցրեցինք Սյունիքը, տապանաքար կդրվի Հայաստանի վրա։ Ֆիթիլը վառել ենք, մի օր դա տրաքելու է թե մեր, թե մեր սերունդների գլխին։ Մենք մտահոգված ենք»,-ասաց Քաջարանի քաղաքապետն ու ընդգծեց՝ ավելի վատ բաներ էլ են լինելու։

Նա պնդում է՝ Հայաստանում պետք է իշխանության գան մարդիկ, ովքեր կարող են խնդիրներին լուծում տալ, և կան նման մարդիկ։

«Մենք պետություն ենք կորցնում, մեր մտահոգությունը դա է»,-նշեց նա։

Հիշեցնենք, որ Քաջարանի քաղաքապետին քննչական կոմիտեն այսօր նոր մեղադրանք է առաջադրել, ինչը նրա փաստաբան Երվանդ Վարոսյանը որակում է քաղաքական հետապնդում։