Ձեր վստահելի աղբյուրը

«Գիտեմ, որ տարվա ընթացքում բազմաթիվ կասկածելի գործարքների վերաբերյալ հաղորդումներ է գնում դատախազություն և ոչ բոլորի դեպքերով են քրեական գործեր հարուցվում, մեղադրական դատավճիռները չափազանց քիչ են, իսկ երբեմն էլ առհասարակ չեն լինում»,- Ֆինանսավարկային և բյուջետային հարցերի մշտական հանձնաժողովի այսօրվա նիստում հայտարարեց հանձնաժողովի նախագահ  Արկադի Խաչատրյանը՝ անդրադառնալով փողերի լվացման խնդրին:

Նա «Փողերի լվացման և ահաբեկչության ֆինանսավորման դեմ պայքարի մասին» օրենքում փոփոխություններ կատարելու մասին նախագիծը զեկուցող ԿԲ նախագահի տեղակալ Ներսես Երիցյանից հետաքրքրվեց, թե ո՞րն է նման անարադյունավետության պատճառը:

«Մեր նման զարգացման մակարդակ և տնտեսական ակտիվություն ունեցող երկրների համար, այն վիճակագրությունը, որն ունենք, կարելի է ասել, որ շեղված չէ լավագույն փորձից»,- հավաստիացրեց  Ներսես Երիցյան:

Նրա խոսքով՝ քրեական գործերով դատավճիռների կայացումը բոլոր երկրներում էլ տարիներ տևող գործընթացներ են, քանի որ նախորդող հանցագործություններն ապացուցելը բավականին բարդ է և լուրջ միջազգային համագործակցություն է պահանջում, իսկ վերջինս միշտ չէ որ արդյունավետ է իրականացվում:

Կենտրոնական բանկի նախագահի տեղակալի ներկայացմամբ՝ գործի մեծությունից և խորությունից կախված տարբեր երկրներում տարբեր մոտեցումներ և ժամանակ է անհրաժեշտ դատավճռի հասնելու համար:

Ներկայացնելով օրենսդրական փափոխության անհրաժեշտությունը՝ Ներսես Երիցյանը տեղեկացրեց, որ  2015թ.-ի Եվրախորհրդի ՄԱՆԻՎԱԼ  ծրևագրի միջոցով ԵԽ փողերի լվացման և ահաբեկչության ֆինասավորման շրջանակներում փոխադարձ գնահատում է իրականացվել, որի արդյունքում էլ պետությունը որոշակի հանձնառություն է ստացել, որպեսզի օրենսդրությունը և դրա կիրառության դաշտը համապատասխանեցվի սահմանված ճափանիշներին:

Բանախոսի ներկայացմամբ՝ ծրագրի մյուս գնահատումը 2021 թվականի վերջին է նախատեսվում:

Ըստ Երիցյանի՝ 2015թ -ից հետո Հայաստանում երկու փուլով օրենսդրության բարեփոխում է իրականացվել և ներկայացվողն երրորդն է, սակայն կարևոր է ոչ միայն օրենքի ընդունումը, այլև դրա կիրառման ճիշտ մեխանիզմները:

Օրենքի նախագծի հիմնավորման մեջ ասվում է, որ  ՄԱՆԻՎԱԼ հանձնախմբի փորձագետների կողմից ՀՀ Փողերի լվացման և Ահաբեկչության ֆինանսավորման դեմ պայքարի համակարգի 5-րդ փուլի գնահատման հաշվետվությամբ արձանագրվել է, որ մեր մոտ նախատեսված չեն օրենսդրական պահանջներ տեղական քաղաքական ազդեցություն ունեցող, միջազգային կազմակերպություններում նշանակալից գործառույթներ իրականացնող անձանց, նրանց ընտանիքի անդամի կամ նրանց հետ սերտորեն փոխկապակցված անձանց վերաբերյալ:

Հետագայում, 2018թ.-ին Արժույթի միջազգային հիմնադրամի կողմից ՀՀ ֆինանսական համակարգի կայունության գնահատման հաշվետվությամբ հանձնարարական է տրվել «Փողերի լվացման և ահաբեկչության ֆինանսավորման դեմ պայքարի մասին» ՀՀ օրենքում տեղական քաղաքական ազդեցություն ունեցող անձանց հասկացությունը սահմանելու և նրանց նկատմամբ պատշաճ ուսումնասիրության հավելյալ պահանջներ կիրառելու վերաբերյալ:

Ըստ այդմ, վերանայվել է «քաղաքական ազդեցություն ունեցող անձ» հասկացությունը: Նախագծով «քաղաքական ազդեցություն ունեցող անձ» հասկացության մեջ են ներառելով ոչ միայն արտասահմանյան երկրի կամ տարածքի նախկին կամ գործող բարձրաստիճան պետական պաշտոնատար անձանց, այլ նաև տեղական բարձրաստիճան պաշտոնատար անձանց, միջազգային կազմակերպություններում նշանակալից գործառույթներ իրականացնող անձանց, ինչպես նաև նրանց ընտանիքի անդամներին կամ նրանց հետ սերտորեն փոխկապակցված անձանց: