Ձեր վստահելի աղբյուրը

«Շարունակվում են նոր ապացույցների ներկայացումը Եվրոպական դատարան ի թիվս այլնի նաև մշակութային և կրոնական հուշարձանների ոչնչացման և սրբապղծման դեպքերի վերաբերյալ»,- «Արցախի վտանգված ժառանգությունը. մարտահրավերների հանգույցում» խորագրով համաժողովում ունեցած ելույթում ասաց ՄԻԵԴ-ում ՀՀ ներկայացուցիչ Եղիշե Կիրակոսյանը: 

Նա ցավով նշեց, որ պատերազմի ընթացքում և պատերազմից հետո շարունակվում են հայկական մշակութային ժառանգության ոչնչացման դեպքերը, Ադրբեջանի վերահսկողության տակ անցած տարածքներում գտնվող հայկական մշակութային ժառանգությունը վտանգված է:

«Մշակութային և կրոնական ժառանգությունն ազգի ինքնության կարևոր բաղադրիչներից է: Հայոց ցեղասպանությունից արդեն թիրախավորվում էին հայկական մշակութային ժառանգության օբյեկտները՝ եկեղեցիներ, սրբավայրեր, որոնք ինքնության էական հանգամանք են հանդիսանում: Դրա համար մշակութային ժառանգության օբյեկտները հատուկ էին թիրախավորվում:

Կարծում եմ՝ այս հիմքը, տրամաբանությունը, որ դրվեց հենց ցեղասպանության ժամանակահատվածում,  նույն ձև շարունակվեց Ադրբեջանի կողմից նաև խորհրդային ժամանակահատվածում»,- ասաց Ե. Կիրակոսյանը:

Նրա կարծիքով, հիմնական գաղափարն ի սկզբանե, միշտ, այսօր էլ կայացել է հայաթափելը Արցախը, նաև փորձել թուրքացնել:

«Այս ամբողջը միջազգային իրավունքի  տեսանկյունից  դատապարտելի ասելը քիչ է,  միջազգային  իրավունքի հիմնարար սկզբունքներով ուղղակիորեն սա արգելված է: Ցանկացած  մարդասիրական իրավունքի հիմնարար նորմ այդ պաշտպանությունը տալիս է»,- ասաց ՄԻԵԴ-ում ՀՀ ներկայացուցիչը:

Այս ամբողջ պատկերը 100-ամյակից ավելի է, պարզ է՝ ցեղասպանությանը հետևող, միգուցե նախացեղասպանական ինչ-որ նշաններ ունեցող երևույթներ են. «Սա իրականում պետք է լուրջ ընկալեն, դրա համար պետք է հասկանանք, թե ինչ քայլեր պետք է հետևեն»:

Ե.Կիրակոսյանն ասաց, որ Եվրոպական կոնվենցիայի տեսանկյունից առկա են ակնհայտ իրավունքների խախտումներ՝ դավանանքի,  ազատության, սեփականության իրավունքները և այլն: Նա հայտնեց, որ այս պահին անելիքներն արվում են, դատարանի շրջանակում էլ շատ ակտիվորեն այս ամբողջ ապացուցողական զանգվածը հավաքագրվում ու ներկայացվում են:

«Եթե միջազգային իրավունքի մասին ենք խոսում, կարևոր հանգամանք է նշել՝ կոնկրետ էթնիկ խմբին կամ էթնիկ միավորին պատկանող մշակութային արժեքների ոչնչացումը  համարվել է  ցեղասպանության դրսևորեման էլեմենտ:

Վերջին տասնամյակներում այս ամենը հասել է  աներևակայելի մակարդակների հայատյացության քաղաքականության  խտացման ֆոնի վրա, հենց այդ ատելության ֆոնի քարոզման արդյունքն է»,- ասաց Ե. Կիրակոսյանը:

Նա նշեց, որ այս ամեն ինչի դեմ պետք է պայքարել, բարձրաձայնել, քանի որ  ժամանակակից միջազգային  իրավունքում, քաղաքակրթությունում սրանք անընդունելի հիմնարար արժեքային էլեմենտներ են:

«Ցավալի է՝ ունենք հարևան, որն ապրում է  այդ արժեքներով, բայց դա փաստ է:  21-րդ դարում այս հանգամանքի մասին խոսելը… Ցավալի է, պատմությունը նորից կրկնվում է: Միջազգային հանրության ուշադրությունը պետք է անընդհատ լինի այս կիզակետի վրա: Պետության կողմից էլ անհրաժեշտ են քայլեր ձեռնարվեն, որոնք հիմա արվում են, նաև այլ քայլեր, որոնց մասին հիմա չեմ կարող խոսել»,- ասաց  ՄԻԵԴ-ում ՀՀ ներկայացուցիչ Եղիշե Կիրակոսյանը: