Ձեր վստահելի աղբյուրը

Բրազիլիայի դեղագործական կարգավորիչ Anvisa-ն թույլ չի տվել ներմուծել ռուսական Sputnik V պատվաստանյութը: Այսօր՝ ապրիլի 27-ին, դեղագործական կարգավորողի խորհրդի անդամները միաձայն որոշել են մերժել այն` «բնորոշ ռիսկերի» և «լուրջ թերությունների» պատճառով:
Anvisa-ի որոշման մեջ ասվում է, որ պատվաստանյութերը մշակողները բավարար տեղեկատվություն չեն տրամադրել դրա հուսալիությունը, որակը և արդյունավետությունը հաստատելու համար: Այս մասին գրում է DW-ն։

Anvisa-ի տեխնիկական ստորաբաժանումը նախկինում խորհուրդ էր տվել չթույլատրել Sputnik V-ի ներմուծումը՝ վկայակոչելով պատվաստանյութի անվտանգության և արդյունավետության հետ կապված «կարևոր խնդիրներ», որոնք անհրաժեշտ է պարզել այն ներմուծելուց առաջ: Հաշվի առնելով ներկայացված փաստաթղթերը, անձնական ստուգումներից ստացված տվյալները և կարգավորող այլ մարմիններից ստացված տեղեկատվությունը՝ կազմակերպությունը նշել է, որ «ռիսկերն» այժմ չափազանց մեծ են:

Ասվում է, որ որոշիչը եղել է պատվաստանյութում ադենովիրուսի առկայությունը, ինչը, ըստ Anvisa-ի դեղերի և կենսաբանական արտադրանքի մենեջեր Գուստավո Մենդեսի, «լուրջ» թերություն է:
Միևնույն ժամանակ, Բրազիլիայի ազգային տեխնիկական կենսաանվտանգության հանձնաժողովը (CTNBio), որը գիտության, տեխնոլոգիայի և նորարարության նախարարությանը կից կառույց է, հաստատել է ռուսական Sputnik V պատվաստանյութի առևտրային օգտագործումը: Հանձնաժողովը թույլատրել է երկրում պատվաստանյութերի արտադրության բացումը: