Ձեր վստահելի աղբյուրը

Մեղրիի քաղաքապետ Մխիթար Զաքարյանի փաստաբան Գայանե Պապոյանն  այսօր միջնորդություն եմ ներկայացրել ՀՀ Գլխավոր դատախազին՝ Զաքարյանի նկատմամբ առաջադրված մեղադրանքը վերացնելու պահանջով։

Փաստաբանը սյունեցի համայնքապետի նկատմամաբ առաջադրված մեղադրանքը որակում է «ակնհայտ անհիմն և շինծու»։

«Հիշեցնեմ, որ և՛ ձերբակալման իրավաչափությունը վիճարկելիս, և՛ կալանավորման միջնորդությունը քննարկելիս Դատարաններն արձանագրել են հիմնավոր կասկածի բացակայությունը, այլ կերպ ասած՝ Մխիթար Զաքարյանի առնչությունն իրեն մեղսագրված արարքին անգամ հիմնավոր կասկածի մակարդակում չի հիմնավորվել։ Ի՞նչ է սա, եթե ոչ քաղաքական հետապնդում։

ՀՀ Գլխավոր Դատախազություն, պարոն Դավթյան, Դուք պարզապես պարտավոր եք գործել քրեական դատավարության օրենսգրքի շրջանակներում և վերացնել ակնհայտ շինծու մեղադրանքը»,-ընդգծել է փաստաբանը։

Հիշեցնենք, որ Սյունիքում Նիկոլ Փաշինյանին հայհոյանքներով, վիրավորանքներով ընդունելուց հետո նա հանձնարարեց ԱԱԾ տնօրենին ու ոստիկանապետին հանրության համար տեսանելի կերպով պատժել տեղի ունեցածի մեղավորներին։ Արդյունքում ձերբակալվեցին սյունեցի համայնքապետեր, նրանց տեղակալներ, համայնքապետարանների աշխատակիցներ, նրանցից ոմանք էլ, ինչպես Շոըռնուխի գյուղապետի եղբայրը, Գորիսի փոխքաղաքապետը ենթարկվեցին բռնությունների։

Մեղրիի քաղաքապետ Մ. Զաքարյանին  մեղադրանք է առաջադրվել առաջադրվել Քրեական օրենսգրքի 258-րդ հոդվածի 3-րդ մասի 1-ին, 2-րդ և 5-րդ կետերի (խուլիգանություն) հատկանիշներով։ 

Թե Զաքարյանի, թե մյուս սյունեցիների դեպքում երևանյան դատարանները ձերբակալումը ոչ իրավաչափ ճանաչեցին, կալանավորման միջնորդություններն էլ գերակշռող դեպքերում չբավարարեցին։