Ձեր վստահելի աղբյուրը

Ոստիկանությունն արձագանքել է «Բարգավաճ Հայաստան» խորհրդարանական խմբակցության Նաիրա Զոհրաբյանի այն ահազանգին, որ Ադրբեջանի գերությունից վերջապես Լիբանան վերադարձված Մարալ Նաջարյանին անձնագիր չեն տրամադրում։

Տարածած հաղորդագրության մեջ ոստիկանությունը մասնավորապես նշում է, որ «ո՛չ Մարալ Նաճարեանը, ո՛չ էլ նրա կողմից լիազորված որևէ անձ ՀՀ ոստիկանության անձնագրային և վիզաների վարչություն կամ տարածքային ստորաբաժանումներ Մարալ Նաճարեանին նոր անձնագիր տրամադրելու վերաբերյալ գրավոր դիմում չեն ներկայացրել։

Ոստիկանությունից միաժամանակ նշում են, որ «ՀՀ քաղաքացու անձնագրի մասին» ՀՀ օրենքով և ՀՀ կառավարության 25.12.1998 թ. թիվ 821 որոշմամբ հստակ սահմանված է անձնագիր ստանալու համար Հայաստանի Հանրապետության քաղաքացիների կողմից անձամբ դիմելու պահանջ։

«Քաղաքացին անձնագիր ստանալու մասին դիմում ներկայացնում է Հայաստանի Հանրապետությունում՝ ոստիկանություն, օտարերկրյա պետությունում՝ Հայաստանի Հանրապետության դիվանագիտական ներկայացուցչություն կամ հյուպատոսական հիմնարկ։
Տպագրված անձնագիրը քաղաքացին կարող է ստանալ ինչպես անձամբ, այնպես էլ լիազորված անձի միջոցով։ Լիազորագիրը նոտարական կարգով վավերացում չի պահանջում։

Մարալ Նաճարեանը ՀՀ քաղաքացու նոր անձնագիր ստանալու համար կարող է անձամբ դիմել ինչպես ՀՀ ոստիկանության ԱՎ վարչություն կամ տարածքային ստորաբաժանումներ, այնպես էլ օտարերկրյա պետություններում ՀՀ ցանկացած դիվանագիտական ներկայացուցչություն, այդ թվում՝ Լիբանանի (նստավայրը՝ Բեյրութ) ՀՀ դեսպանություն»,-ասված է հաղորդագրության մեջ։