Ձեր վստահելի աղբյուրը

«Ուզում եմ միանգամից դիմել մեր իրավապահ համակարգին՝ ԱԱԾ, քննչական ծառայություն, գլխավոր դատախազություն, ոստիկանություն, հասկանան, որ հիմա իրենք գտնվում են այնպիսի դիրքերում, որտեղ իրենց կայացրած վճիռներով որոշում են մեր երկրի ոչ թե միայն այսօրը, այլ նաև ապագան»,- դատախազության դիմաց ՀՅԴ կազմակերպած բողոքի ակցիայի ժամանակ ասաց «Ճշմարտություն հանուն սերունդների» նախաձեռնության հիմնադիր, քաղաքագետ Գեղամ Նազարյանը:

Նա նշեց, որ ուզում է իրավապահ համակարգին հիշեցնել՝ ունեն ավելի կարևոր գործ, քան իշխանությունը բռնազավթած, պարտության սիմվոլին պաշտպանելն ու պահելը:

«Այսօր իշխանությունը մի մարդ, մի ուժ բռնազավթել է: Դատախազություն, ԱԱԾ, ոստիկանության, քննչական ծառայություն դուք զբաղվեք այդ հարցով, ինչու եք դուք աջակցում և դառնում նրա հետ միասին հանցագործ»,- ասաց Գ. Նազարյանը:

Նա նշեց, որ իրենց՝ «Ճշմարտություն հանուն սերունդների» նախաձեռնությունը մի քանի հրապարակում է արել Լելե Թեփեի օպերացիայի մասին. «Ինչո՞ւ չեք զբաղվում Լելե Թեփեի խայտառակ օպերացիայի քաղաքական որոշման պատասխանատուին գտնելով, ձերբակալելով: Չէ որ այնտեղ առնվազն 700 հայ երիտասարդ սպանվեց մի հիմար, արնախում որոշման պատճառով:

Ինչո՞ւ չեք հետաքննում, թե ինչ եղավ Շուշիում, ինչպես հանձնվեց այդ քաղաքը, ինչպես այնտեղ մեր տղաները մնացին մենակ առանց պաշտպանության, ինչո՞ւ չեք այդ տականքին ձերբակալում, հարցաքննում, ինչո՞ւ չեք նրա կնոջից հեռախոսը վերցնում, հարցաքննում՝ պարզելու համար, թե ինչ էր անում բունկերում:

Դատախազություն, այս տղերքին, որոնք Հայաստանի համար են պայքարում, նրանց ձերբակալելու, ազատ արձակելու, շնորհակալություն հայտնելու փոխարեն գնացել և իշխանությունը բռնազավթած ուժերին եք ծառայել»:

Նա կոչ արեց իրավապահներին՝ չկանգնել դավաճանի կողքին:

«Արթուր Դավթյան և մնացածներ, դուք երևի գիտեք Եժովի մասին, բայց երևի միայն գիտեք, թե ինչ եղավ նրա հետ, չգիտեք թե նրան ձերբակալելուց և նրան պատժելուց հետո ինչ եղավ մնացած տասնյակ, հարյուրավոր դատախազների հետ, նրանք ավելի վատ ճակատագրի արաժանացան»,- ասաց Գ. Նազարյանը:

Նա նշեց, որ ինքը միանում է սյունեցիների ջերմ ողջյուններին:

«Սյունեցիներից յուրաքանչյուրը դարձավ Գարեգին Նժդեհ, իսկ Նժդեհը փրկեց Հայաստանի այդ հատվածը: Ալիևն այսօր այս խամաճիկների հետ փորձում է իրականացնել այն, ինչը նրանց խանգարեց Նժդեհը 1918, 1920, 1921 թվականներին:

Ձեռքներդ հեռու սյունեցիներից, մեր տղերքից, որոնք պայքարում են Հայաստանի այսօրվա, վաղվա, լավ ապագայի համար»,- նշեց Գեղամ Նազարյանը:

Նա կոչ արեց իրավապահներին գիշերը քնելուց առաջ մտածել վաղվա օրվա մասին:

«Եթե չգիտեք՝ տեղեկացնեմ, շատ շուտով այս իշխանությանը ցախավելներով դուրս են շպրտելու և հայտնվելու են բանտի ամենախոր անկյուններում: Ձեզ մի կապեք այդ հանցագործների, արնախումների հետ, որոնք տարան 5000 երեխու սպանեցին ու այսօր դեռ ասում են՝ էդ ձեր մեռած երեխեքը: Այ տականքներ, մեռածը դուք եք ու ձեր մեռած իշխանությունն ու կառավարությունը»,- ասաց Գեղամ Նազարյանը: