Ձեր վստահելի աղբյուրը

«Հայաստանն իր ողջ հնարավորությունները գործադրելով պետք է մի այնպիսի արշավ սկսի, որ Ադրբեջանը չդիմանա ու արագ վերադարձնի մեր  գերիներին»,-իր աջակիցների հետ հանդիպմանը, անդրադառնալով պատերազմի ընթացքում ու դրանից հետո գերեվարված զինվորների, քաղաքացիական անձանց վերադարձի խնդրին, հայտարարել է ՀՀ երկրորդ նախագահ Ռոբերտ Քոչարյանը։

Նրա խոսքով, եթե այս տեմպով կառավարությունն աշխատի գերիների վեադարձի ուղղությամբ, ապա այդ գործընթացը կարող է տարիներ տևել։

ՀՀ երկրորդ նախագահը նշել է, որ գերիներ պահող երկրների վրա միջազգային ուժեղ ճնշում է լինում, և Հայաստանն իր ողջ ուժերով, այդ թվում և դիվանագիտական խողովակներով, պետք է ուժեղացի Ադրբեջանի վրա ճնշումը, որպեսզի նրա նյարդերը տեղի տան։

«Իմ տպավորությամբ, Ադրբեջանը մեր պետությունից դեռ ինչ-որ բան է ուզում, և դրա համար են պահում մեր գերիներին։ Տպավորությունն այսպիսին է, քանի որ մարդկանց պահելով, ահաբեկիչներ որակելով Ադրբեջանը որևէ քաղաքական հարց լուծել չի կարող, հակառակը իմիջային կորուստներ կարող է ունենալ միջազգային ինստիտուտների հետ հարաբերություններում։ Բայց պահում են այն ակնկալիքով, որ դրա դիմաց որևէ բան են ստանալու, դա կարող է կապված լինել հյուսիսի հետ, որովհետև այնտեղ անկլավների խնդիր կա, կարող է լինի Սյունիքում միջանցքի հարցը, Ղարաբաղում Կարմիր շուկա-Շուշի ճանապարհի կառուցման հարցը, կարող է լինել նաև Ղարաբաղում Պաշտպանության բանակի կարգավիճակի հարցը։ Այս հարցերի շուրջ Ադրբեջանը ակնկալիքներ, ախորժակ ունի, և իրենց թվում է, թե գերիների հարցն այն մահակն է իրենց ձեռքին, այն լծակը, որով  Հայաստանին կարող են պարտադրել Հայաստանին զիջումների գնալ։ Մենք չպետք է թույլ տանք, որ գերիների հարցը առևտրի առարկա դառնա, ու դա լավ չի հենց գերիների համար, քանի որ կարող են մի մասին թողնել, մյուսների վերադարձի համար նոր պահանջներ դնել»,-հայտարարել է Ռոբերտ Քոչարյանը։

ՀՀ երկորրդ նախագահն ընդգծել է, որ սա ծանր հարց է, թե մարդկային, թե քաղաքական առումով։