Ձեր վստահելի աղբյուրը

«Վերջին շրջանում իրավաբանության հետ նշույլ անգամ աղերս չունեցող մարդիկ շատ լուրջ մեկնաբանում են սահմանադրական նորմերը, և այդ մթնոլորտը ձևավորվել է վերջին երեք տարիների ընթացքում»,- այսօր «Վարչապետի հրաժարականով պայմանավորված ԺՊ-ի սահմանադրականությունը» թեմայով քննարկման ժամանակ ասաց իրավաբան Արամ Վարդևանյանը։

Նրա խոսքով, Հայաստանում սահմանադրաիրավական դիսկուրսն այս աստիճանի պրիմիտիվ երբևէ չի եղել։

«Սահմանադրության 158-րդ հոդվածը ուղղակի մեկնաբանվում է, որ կառավարության անդամները շարունակում են պաշտոնավարել։ Վերջ, դրանով դիսկուրսը փակվեց։ Այսինքն՝ եթե հեռակառավարման վահանակի օգտագործման համար ներկայացված սխեմայի նման որևէ բան չկա, որ պետք է նախ մարտկոցը դնել, ապա այս ու այն անել, նոր օգտագործել, ապա ուղղակի այս մի տողով մեկնաբանում են ամեն ինչ ու վերջ։ Տեսեք, ոչ միայն վարչապետի ժամանակավոր պաշտոնակատար հասկացություն չկա, այլ առհասարակ, դրան առնչվող որևէ ձևակերպում էլ չկա։ Վարչապետի պարտականություն կատարողը հենց պարտականություն կատարող է, այլ ոչ՝ ժամանակավոր պաշտոնակատար»,- նկատեց նա։

Իրավաբանը նշեց, որ վարչապետի կողմից հրաժարական ներկայացնելը տարբերվում է կառավարության հրաժարականի մյուս բոլոր հիմքերից, մի պարզ պատճառով, մարդը կամք է հայտնել, ասել է, որ ուզում է հրաժարական տալ։

«Իսկ իրենք հիմա սահմանադրությունն այնպես են մեկնաբանում, որ հրաժարական տալը հրաժարական տալը չէ, որ այն ոչ մի հետևանք չունի։ Հա, նստում, հրաժարական է տալիս, բայց պարտականությունները շարունակում է կատարել, ինչպես ինքն է նշում՝ ամբողջ ծավալով։ Բա հրաժարականն ի՞նչ է։ Հրաժարականը կամքի արտահայտում է, և նման դեպքում, օրինակ՝ կառավարության մյուս անդամները նման կամք չեն արտահայտել։ Իսկ վարչապետը միակ անձն է, որ ասել է՝ ես էլ չեմ ուզում պարտականություն կատարել։ Չի կարող նորմի մեկնաբանությունն այս աստիճան խեղված լինել»,- նկատեց նա։

Արամ Վարդևանյանի խոսքով, կառավարության հրաժարական տալը ճգնաժամ է, և ըստ սահմանադրության, 7 օրվա ընթացքում պետք է նոր վարչապետ ընտրվի, եթե այդ ընթացքում չի ընտրվում, մի անգամ էլ պետք է 7 օրվա ընթացքում փորձել։ Իսկ եթե դա էլ չի լինում, հայտարարվում են արտահերթ խորհրդարանական ընտրություններ։

«Դա ճգնաժամի ամենաբարձր մակարդակն է։ Եվ ՀՀ-ն աշխարհի միակ երկիրն է, որ այդ ճգնաժամը դիտարկում է որպես տեխնիկական գործողություն։ Եվ գնում ենք արտահերթ ընտրությունների, կարծես թե, դա հենց միակ բնականոն վիճակն է։ Սա էքսեսային իրավիճակի ռեժիմ է, բայց կարևոր է հասկանալ, որ այդ իրավիճակն առաջացել է այն պատճառով, որ վարչապետը պարզապես իր կամքն է հայտնել, որ էլ չի ուզում  վարչապետ լինել»,- ասաց նա։