Ձեր վստահելի աղբյուրը

«Այս պահին միայն հստակ որոշում կա՝ հնարավոր արտահերթ ընտրություններին ՀՀԿ-ի գնալ դաշինքով, իսկ ցուցակի, դաշինքի անվան, ծրագրային դրույթների մասով նորությունները կհրապարակենք  հավանաբար այն ժամանակ, երբ  արդեն կլինի ընտրություններ անցնակցելու մասին հրամանագիր»,- ասուլիսում հայտարարեց «Հայրենիք» կուսակցության մամուլի քարտուղար Սոս Հակոբյանը։

Նա ընդգծեց՝ այս պահին ցուցակի մասին որևէ հստակեցում չկա, չի կարող լինել, աշխատանքներն ընթացքի մեջ են. «Կտեսնեք, որ իրապես հզոր, մասնագիտական,  փորձատու և երիտասարդ գործիչների թիմ է լինելու»։

Նա նշեց, որ ցուցակում չեն կարող լինել մարդիկ, որոնք, իրենց ընկալմամբ, օրենքի հետ կարող է խնիդրներ ունենան։

«Ցուցակում լինելու են երկու սկզբունքի վրա հիմնված մարդիկ, որոնք ունեն հանրության շրջանում վստահություն, որոնք կարող են օգտակար լինել  Հայաստանին իրենց կարողությունների՝ մասնագիտական, քաղաքական փորձառություն, շրջանակում»,- ասաց «Հայրենիք» կուսակցության մամուլի քարտուղարը։

Նա նշեց, որ Արթուր Վանեցյանը՝ որպես «Հայրենիք» կուսակցության նախագահ,  շատ առանցքային դեր է ունենալու արտահերթ ընտրություններում և ողջ քաղաքական գործընթացում, կարծում է, ինչպես նաև իրենց հետ դաշինքի գնացող ուժի ղեկավարը։

«Բայց թե ով կլինի առաջին համար, ինչ տեսքով կլինի  առաջարկվող կառավարության կամ Ազգային ժողովի ցուցակը, դեռ հստակեցում չկա, քննարկվում է»,- ասաց Ս. Հակոբյանը։

Հարցին՝ մինչև այս դաշինքի ձևավորումը, «Հայրենիքը» քաղաքական կոնսուլտացիաներ ունեցե՞լ է այլ ուժերի հետ, օրինակ, Հանրապետության երկրորդ  նախագահ Ռոբետ Քոչարյանի, ՀՅԴ-ի, ինչո՞ւ եզրահանգեցիք, որ հենց այս դաշինքով  գնաք ընտրությունների, Ս. Հակոբյանը նախ ասաց, որ, բնական է, կոնսուլտացիաներ եղել են, միգուցե կշարունակվեն այն իմաստով, որ «Հայրենիք»-ՀՀԿ դաշինքի դռները փակ չեն նոր ուժերի համար, եթե, իհարկե, բոլորը գան համաձայնության, որ, օրինակ, որևէ մեկը կարող է միանալ։

«Երկրորդ  նախագահի շուրջ ձևավորված դաշինքի առումով մեր ընկալումը հետևյալն է, որ սա ավելի շատ մարտավարական խնդիր է, այսինքն երկու հզոր ընդդիմադիր բևեռները  մեծ հաշվով  գտնում են, որ  արդյունքի հասնելու համար ընտրության գնալու առավել ճիշտ  քաղաքական կոնֆիգուրացիան  սա է։ Դա զուտ մարտավարական, մասնագիտական, քաղաքագիտական առումով որոշում է, բայց ոչ ստրատեգիաների  և  նպատակների տարբերության»,- ասաց Ս. Հակոբյանը։

Նա ընդգծեց, որ սա բնական ձևավորված իրավիճակն է բոլոր ընդդիմադիր ուժերի հետ կոնսուլտացիաներ անելու արդյունքում։

«Գտնում ենք, որ մրցակցությունն  ընդդիմության ուժերի մեջ չէ, ընդդիմության բոլոր ուժերն ունենալու են հստակ մեկ թիրախ՝ օր առաջ այս պատուհաս իշխանությունից ազատվելը։ Միգուցե մեր կողմից կլինի առաջարկություն, որ մեր մտայնությունը, մեր թիրախն ու ռազմավարությունն  ընդհանուր ընդդիմադիր ուժերի հետ որևէ կերպ ամրագրել, օրինակ հուշագրի տեսքով։ Բայց դրա մասին կխոսենք, երբ որ արդեն լինեն ընտրություններ, դաշինքը հանդես գա պաշտոնապես։ Մենք փորձելու ենք ամեն ինչ անել, որպեսզի ընդդիմության միջև  արհեստական շահարկումներ  կամ մրցակցություն, որը մեր ընկալմամբ այս պահին չկա, չմտցվի»,- ասաց նա։

Պատասխանելով «Հայրենիք» կուսակցության նախագահ Արթուր Վանեցյանի նախկին հայտարարությունների վերաբերյալ հարցերին, մասնավորապես նախկինին վերադարձ չի լինելու, Ս. Հակոբյանն ասաց. «Կուսակցության նախագահն ասել է երկու հստակ թեզ՝ սևերի և սպիտակների բաժանումը կեղծ օրակարգ է, նախկինին վերադարձ չի լինելու։

Երեկ զրույց եմ ունեցել «Հայրենիք» կուսակցության նախագահի հետ, ևս մեկ անգամ շեշտադրել է, որ  մեր իշխանության գալու պարագայում  անգամ իր ամենամտերիմ անձը, ով կունենա խնդիր օրենքի հետ, կրելու է օրենքով սահմանված խիստ պատասխանատվություն։

Նախկինին, նախկին բարքերին, այն, ինչ միգուցե տանելի էր նոր ստեղծված երկրում, վաղը  պետք է տանելի չլինի, կարծում եմ, որ այս մասով նույնիսկ ՀՀԿ-ն է իր հստակ դիրքորոշումը հայտնել»։

Նա ընդգծեց՝ երբ իշխանության մեջ լինեն, թե բարոյական առումով պահանջներն են շատ ավելի լինելու իշխանության մեջ գտնվող անձանցից, թե իրավական պահանջները խստորեն պահանվելու են։