Ձեր վստահելի աղբյուրը

Նորից  մանր չափսերի  սիգեր են որսում։ Այս մասին  Panorama.am-ի հետ զրույցում մտահոգություն հայտնեց ՀՀ ԳԱԱ Կենդանաբանության և հիդրոէկոլոգիայի գիտական կենտրոնի տնօրեն, պրոֆեսոր Բարդուխ Գաբրիելյանը։

«Խնդիրն այն է, որ գոնե որսան արդյունագործական չափսերի հասած ձկներ, գոնե դա պետք է հսկողության տակ առնվեր։Այն մանր ձկները, որոնք գոնե մեկ անգամ չեն ձվադրել , չորսային։ Բայց ես տեսնում եմ, որ էլի որսում են՝ 100-200 գրամանոց ձկներ։ Այս թանկարժեք, բնական կերով սնվող ձկները վաճառվում են կոպեկներով»,-ասաց Գաբրիելյանը։

Մասնագետի խոսքով՝ թեև Կառավարությունը ծրագիր է իրականացնում ՝ սիգի արդյունագործական որսը վերահսկելու համար, սակայն ինչպես երևում է, այն անարդյունավետ է։

«Հնարավոր է գոնե վերահսկողություն սահմանել մանր ցանցերով ձկնորսական գործիքներն արգելելու համար։ Նման պայմանավորվածություն եղել է  որսի արտոնագիր ստացած ձկնորսների հետ, սակայն ստացվում է, որ էլի չի կատարվում»,- ավելացրեց նա։

Թեև պաշտոնական տվյալներով արդյունագործական նպատակներով  236 տոննա սիգի որսի ընդհանուր պաշարից  որսվել է 204 տոննան, այսինքն ՝ ավելի քիչ , քան նախատեսված էր։ Սակայն գիտնականի համոզմամբ՝ նշված թվերն իրականությունը չեն արտացոլում։

«Ճիշտ է՝ պաշտոնական տվյալներով նույնիսկ սահմանված քանակներին չի հասել, սակայն բոլորս էլ գիտենք, որ մի քանի անգամ ավելի շատ է որսացվել։ Բացի դրանից , մենք տեսանք , որ թե  նախաձվադրման թե ՝ ձվադրման շրջաններում  մայրաքաղաքի շուկաներում շարունակում էին վաճառել և սիգի ձկնկիթը,և  մանրաձուկ։

Թե ինչպես է հնարավոր կարգավորել խնդիրը,որպեսզի չտուժեն ոչ ձկնորսները, ոչ էլ՝ բնությունը, գիտնականի խոսքով ՝ իրենք  առաջարկներ ներկյացրել են նախարարին՝ որորտն ամողջությամբ պետականացնելու ուղղությամբ։ Այսինքն՝ ձկնորսները որպես աշխատողներ պետության կողմից  աշխատավարձ պետք է ստանան, իսկ հասույթը տնօրինի պետական որևէ կառույց։

Ըստ Գաբրիելյանի՝ ամեն ինչ հնարավոր է քաղաքակիրթ ձևով կազմակերպել ՝ նավակները ստուգվեն, անվտանգության կանոնները պահպանվեն, իսկ որսված ձկները  հանձնեն պետական կառույցի, որն էլ իր հերթին կտրամադրի վաճառքի կետերին։ Այս կերպ կխուսափենք նաև  փողոցում, հակասանիտարական պայմաններում  ձկան վաճառքից։