Ձեր վստահելի աղբյուրը

Տեղահանված քաշաթաղցիները և քարվաճառցիները բողոքի ակցիա են անում Հայաստանի կառավարության շենքի մոտ։ Քաշաթաղի շրջանի Միջնավանի քաղաքապետարանի քարտուղար Մարիամ Հայրապետյանը լրագրողներին ասաց, որ այստեղ են հավաքվել մի պարզ պատճառով՝ այն ինչ որոշում է  կառավարությունը, պաշտոնապես հայտարարում են, իրականում ոչ մի բան չի կատարվում:

«Մենք տեսել են, թե ոնց են հաղթած պարտություն դրել մեր ուսերին: Մենք մնացել ենք անելանելի վիճակում: Երեկ Ստեփանակերտից եկել էր պարոն Խանումյան Հայկը, իր տեսակետը հայտնեց՝ ասելով, որ քաշաթաղցիները, բոլորը պետք է գան, տեղավորվեն, շենացնենք Ղարաբաղը, նորից բնակեցնենք: Սիրով, ընդունում եմ, պետականամետ քաղաքականություն է, բայց ինչ վերաբերում է Քաշաթաղի շրջանի հարավային թևին, այնտեղ բնակիչները  բոլորը վերաբնակեցվածներ են, որոնք 30 տարի շարունակ արյուն, քրտինք են թափել, հող են սարքել, տուն են դրել, բայց, բառիս բուն իմաստով, մի ձեռք հագուստով կանայք մի կերպ վերջին օրը դուրս են եկել, իսկ տղամարդիկ դիրքերում են եղել, Ջաբրայիլն ու Իշխանաձորն են պահել:

Հիմա այս մարդկանց համոզել, որ գնան Մարտակերտի ամենահեռու գյուղերում հող դնեն, մշակեն, ասում են՝ մենք ձեր տունը կսարքենք, գույքը կտանք, չեք գա՝ չեք ստանա ոչ մի բան: Մենք կառավարությունից խնդրում ենք՝ որոշումները, որոնք կայացնում են, համաձայնեցնեն իրենց հետ»,- ասաց տիկին Մարիամը:

Նա նշեց, որ տարբերակում չի դնում՝ Հայաստան է, թե Արցախ, Արցախի համար իր տղան կռվել է, ինքն ամեն օր լաց է լինում Արցախի համար, բայց բավական է պետական մակարդակով խաբեն մարդկանց:

«Մենք օգնություն մուրացող չեն, մենք արյուն, քրտինքով հող են մշակել, տուն ենք դրել, հերիք է մեզ խաբեն»,- ասաց նա:

Նույն շրջանի բնակիչ Անուշ Պետրոսյանն ասաց, որ վարկ էր վերցրել, տուն էր կառուցել, որպեսզի երեխաները վայելն, սակայն որդին գնաց պատերազմ ու չեկավ:

«Ամեն ինչ թողել եմ: Եթե ինձ կվերադարձնեն իմ Միջնավանը, վազելով կգնամ, բայց ուրիշ տարածք չեմ գնա ու չեմ ապրի»,- ընդգծեց տիկին Անուշը:

Նա պատմեց, որ այստեղ ապրում է վարձով, մինչև հիմա 68 հազար դրամներն էլ չի ստացել:
Մարիամ Հայրապետյանն ասաց, որ եթե Հայաստանն իրեն չապահովի, միջազգային դատարան է դիմելու միջնավանցիների անունից:

«Այլևս կառավարությանն էլ չեմ հավատում, ոչ մեկին չեմ հավատում, որովհետև բոլոր տեղերում խաբում են: Այն հանգանակության գումարները, որ եկել է մեր անունով, ոնց են յուրացրել ու յուրացնում են: Թող վերանայեն, թե ում են նշանակում հիմնադրամների ղեկավար, ներքին կարգով այս փողերը ոնց են լվանում:

Շնորհակալ ենք ՀԿ-ներին, անհատներին, որոնք աջակցություն ցուցաբերել են մեզ, բայց կառավարության մակարդակով խաբված ենք: Վարկերը ենք ունեցել, խեղդել են, մարել ենք:
Այդ 300 հազար դրամն են ասում, բայց այս պայմաններում կոպեկներ են»,- ասաց նա:

Տիկին Մարիամ խոսքով, տղան Ջաբրայիլից հիվանդ իջել է, գնում է հիվանդանոց՝ աստեղից այնտեղ են ուղարկում, արդեն հոգնել են այս ամեն ինչից:

«Բոլորին խաբում են, մեր ժողովրդին խաբում են թե վարչակազմից, թե Ստեփանակերտից Արայիկ Հարությունյանը, թե Հայաստանից: Բոլորին խաբում են՝ առանց հաշվի առնելու մարդկանց կարգավիճակը»,- նշեց նա: 

Փաշինյանի օգնական Նաիրի Սարգսյանը հանդիպեց բողոքող քաշաթացիների հետ, ասաց, որ նրանց կընդունի փոխվարչապետ Մհեր Գրիգորյանը, քանի որ Փաշինյանը գնալու է ԱԺ:

Քաշաթացիցներն ասացին, որ ուզում են հանդիպել անձամբ Փաշինյանի հետ, գիշերն էլ այստեղ կմանան: Ի վերջո համաձայնվեցին հանդիպել Մհերի Գրիգորյանին:

Հանդիպումից հետո Քաշաթաղի շրջանի Հայկազյան համայնքի ղեկավար Արմեն Չոմոյանն ասաց, որ քննարկել են լուծումներ, հավաստիացրել են, որ մինչև մայիսի վերջ կլինի որոշումների նախագիծ, կդրվի հանրային քննարկման:

Հարցին՝  նախագիծը բնակարաններով ապահովելու մասի՞ն է, թե՞  դրամական օգնության, նա նշեց, որ ծրագրից պարզ կդառնա: Ա. Չոմոյանի խոսքով, այդ նախագիծը վերաբերելու է տեղահանված բոլոր ընտանիքներին: