Ձեր վստահելի աղբյուրը

«Մեր գործողությունները պայմանավորված չեն ընտրություններով: Մեր նպատակն է ապահովել տարեկան գնաճի նպատակային ցուցանիշը 4 տոկոսի մակարդակում»,- հրավիրված մամուլի ասուլիսում հայտնեց ՀՀ կենտրոնական բանկի նախագահ Մարտին Գալստյանը՝ հավաստիացնելով, որ այսօրվա  բանկի խորհրդի նիստում վերաֆինանսավորման տոկոսադրույքի բարձրացումը պայմանավորված չէ առաջիկա արտահերթ ընտրություններով:

ԿԲ նախագահը հավելեց, որ հանրապետության գլխավոր դրամատան խորհրդի հաջորդ նիստը տեղի կունենա հունիսի 15-ին, որի ժամանակ վերաֆինանսավորման տոկոսադրույքի վերաբերյալ նոր որոշում կկայացվի:

Գալստյանի կանխատեսումներով՝ վերաֆինանսավորման տոկոսադրույքի բարձրացման որոշումից հետո վարկավորման տոկոսադրույքը որոշակիորեն կաճի:

«Մենք տեսնում ենք, որ շուկայում կա ներգրավման միջոցների տոկոսադրույքների աճ, ինչը կհանգեցնի նաև, բնականաբար, վարկավորման տոկոսադրույքի որոշակի աճի»,- հայտնեց ԿԲ նախագահը:

Մարտին Գալստյանի խոսքով, վատորակ ակտիվների թիվը մոտավորապես 7 տոկոս է և սպառողական վարկերի համար ավելի բարձր տոկոս է, քան բիզնես կամ գյուղատնտեսական վարկերի համար:

Հիշեցնենք, որ Կենտրոնական բանկի խորհուրդը մայիսի 4-ի նիստում որոշել է բարձրացնել վերաֆինանսավորման տոկոսադրույքը 0.5 %-ով՝ սահմանելով 6.0%: