Ձեր վստահելի աղբյուրը

«Ադրբեջանի կողմից վերականգնման քողի տակ ապամոնտաժվում և ոչնչացվում է հայկական մշակութային ժառանգություններից մեկը՝ օկուպացված Շուշիի Սբ. Ղազանչեցոց տաճարը»,- այսօր ԱԺ հայտարարությունների ժամին ասաց «Լուսավոր Հայաստան» խմբակցության պատգամավոր Աննա Կոստանյանը։

Նրա խոսքով, սա հերթական անգամ ապացուցում է, որ Ադրբեջանը որևէ կերպ չի կարող վերականգնել մի ազգի մշակութային արժեքները, որի դեմ տասնամյակներ շարունակ ամենաբարձր պետական մակարդակով ատելություն է տարածել։

«Շատ պարզ է նպատակը՝ ջնջել հայկական ներկայությունն ու հետքը այս տարածաշրջանում։ Արցախում հայկական քրիստոնեական մշակույթն այլոց վերագրելու այս քաղաքականությունը բազմիցս քննադատության է արժանացել պատմաբանների ու մշակութաբանների կողմից, և հենց սա է նաև պատճառը, որ Ադրբեջանը մինչ օրս թույլ չի տալիս ՅՈւՆԵՍԿՕ-ի անկախ փորձագիտական խմբին այցելել տարածաշրջան»,- նշեց նա։

Պատգամավորի կարծիքով, միջազգային հանրությունը միայն կոչեր է հնչեցնում, բայց որևէ գործնական քայլ չի իրականացնում հայկական պատմամշակութային արժեքները պահպանելու ուղղությամբ։

«Այլապես ինչպե՞ս է կարողանում Ադրբեջանն իր այս կործանարար գործունեությունը շարունակել։ Ես ուզում եմ հարցնել՝ արդյո՞ք մեր պատկան մարմինները պատշաճ ձևով դիմել են ՅՈւՆԵՍԿՕ-ին, «Կապույտ Վահան» միջազգային կազմակերպությանը և մի շարք այլ կառույցների, որոնք նպատակ են հետապնդում հակամարտության գոտում գտնվող մշակութային ժառանգությունը պահպանելու։ Ադրբեջանը հայկական Շուշիի մայր տաճարի հետ կապված այս գործողությունները առաջին անգամ չէ, որ իրականացնում է, և այն էլ առանց Հայ առաքելական եկեղեցու թույլտվության»,- նշեց պատգամավորը։