Ձեր վստահելի աղբյուրը

Հավաքական անվտանգության պայմանագրի կազմակերպությունը (ՀԱՊԿ) ողջունում է Ղրղզստանի և Տաջիկստանի սահմանին բախումները դադարեցնելու մասին համաձայնագիրը և ռազմական տեխնիկայով լրացուցիչ զորամիավորումների դուրսբերումը: Այս մասին գրում է Tass-ը։

«ՀԱՊԿ-ը ողջունում է Ղրղզստանի և Տաջիկստանի սահմանին բախումների դադարեցումը, ռազմական տեխնիկայով լրացուցիչ զորամիավորումների դուրսբերումը և վիճահարույց սահմանային խնդիրները քաղաքական և դիվանագիտական մեթոդներով լուծելու կողմերի ցանկությունը` դաշինքի և բարիդրացիության ոգով, ինչը կազմակերպության գործունեության հիմքն է», - ասվում է հայտարարության մեջ:

Ղրղզստանի և Տաջիկստանի սահմանին իրավիճակը թեժացավ ապրիլի 28-ին`ջրային ռեսուրսների հասանելիության շուրջ տեղի բնակիչների միջև կոնֆլիկտի արդյունքում: Հրազենի օգտագործմամբ մի քանի բախումներից հետո այդ տարածքում բախումներ սկսվեցին երկու երկրների զինվորականների միջև:

Ըստ ղրղզական կողմի՝ «Головной» ջրի բաշխման կենտրոնը «Ղրղզստանի Հանրապետության ռազմավարական օբյեկտ է և գտնվում է Ղրղզստանի տարածքում»:

Իր հերթին, Դուշանբեն պնդում է, որ 1924-1927 և 1989 թվականների քարտեզներին համապատասխան, ջրի բաշխման կենտրոնն «ամբողջությամբ պատկանում է Տաջիկստանի Հանրապետությանը»:

Բախումների արդյունքում երկու կողմից զոհվել է շուրջ 50 մարդ, ավելի քան 200-ը վիրավորվել է: