Կորոնավիրուսի համավարակի ժամանակ գլխավոր խնդիրը խուճապային վիճակն էր. Թաթոյան

Իրավունք 11:23 06/05/2021 Հայաստան

Կորոնավիրուսի համավարակի ժամանակ գլխավոր խնդիրը խուճապային վիճակն էր. Թաթոյան

«Կորոնավիրուսի համավարակի ժամանակ գլխավոր խնդիրը խուճապային վիճակն էր, արագ էին փոխվում սահմանափակումները»,- ԱԺ-ում Պաշտպանի գրասենյակի 2020 թվականի գործունեության վերաբերյալ հաշվետվությունը ներկայացնելուց հետո պատասխանելով պատգամավոր Տիգրան Ուրիխանյանի հարցերին կորոնավիրուսային վարակի ընթացքում սահմանափակումների մասին ասաց ՀՀ Մարդու իրավունքների պաշտպան Արման Թաթոյանը:

Նա նշեց, որ գլխավոր խնդիրն է մարդկանց իրազեկելը, ճիշտ բացատրելը, թե ինչու համար են այդ սահմանափակումները:

«Առհասարակ, կորոնավիրուսի դեմ պայքարը երկու բարիքների պաշտպանության և հավասարակշռման բալանսի քաղաքականություն է պահանջում: Նկատի ունեմ մի կողմից հանրային առողջությունը, հանրային շահի պաշտպանությունը, մյուս կողմից քաղաքացու իրավունքը»,- ասաց Ա. Թաթոյանը:

Նա նշեց, որ պետությունը ինչ էլ սահմանի, պետք է դա լինի անհրաժեշտ, պիտանի, մարդու համար ընկալելի, հասկանալի, անհրաժեշտ առողջության պաշտպանությանը, կամ եթե ենթարկվելու են սահմանափակումների, զրկանքների, ի վերջո հանրային առողջության պաշտպանության համար է:

Պատգամավորը նաև բարձրացրեց մեկ այլ հարց: Նա նշեց, որ մարդկանց պարտադրում են, այդ թվում նրանց, ովքեր վարակված են եղել, հակամարմիններ կրող են, վճարել էական գումարներ և օդանավակայան ժամանելիս պարտադիր ստանան տեղեկանքներ առ այն, որ հանձնել են թեստ:

Ա. Թաթոյանն ասաց, որ աշխարհում փորձը տարբեր է, երկրները, նաև մեր երկիրը, առաջին անգամ են բախվում այս վարակին, այս վարակի առաձնահատկությունն այն է, որ սահմանփակումները շատ արագ էին փոխվում:

«Կարևոր հարց եք բարձրացնում: Այս քննարկումից հետ, եթե համաձայն եք, համատեղ կաշխատենք, հարկ եղած դեպքում կառավարությանն էլ կդիմենք, համատեղ միջոցներ ձեռնարկենք կարգավորման համար»,- ասաց Ա. Թաթոյանը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: