Ձեր վստահելի աղբյուրը

Հերթական անգամ Երևան այցի առաջին իսկ պահից մենք զգում ենք հայ ժողովրդի, մեր բարեկամների ջերմ վերաբերմունքը: Այս մասին հայտարարել է ՌԴ ԱԳ նախարար Սերգեյ Լավրովը Նիկոլ Փաշինյանի հետ հանդիպման ժամանակ, փոխանցում է  ՌԴ ԱԳՆ-ն։

«Շնորհակալ ենք Ձեզ այն ուշադրության համար, որն անձամբ Դուք եք հատկացնում մեր պատվիրակությանը:

Այսօր ձեզ հետ շփումների զարգացման ընթացքում մենք ծավալուն, առարկայական, գաղտնի բանակցություններ ենք վարել երկկողմ հարաբերությունների բոլոր հարցերի, տարածաշրջանային խնդիրների, միջազգային կազմակերպություններում համագործակցության վերաբերյալ: Եվս մեկ անգամ մենք վերահաստատեցինք դաշնակցային կապերի և ռազմավարական գործընկերության առանձնահատուկ կարևորությունը մեր փոխգործակցության բոլոր ոլորտներում:

Ռուսաստանի Դաշնության նախագահ Վլադիմիր Պուտինի հետ ձեր քաղաքական երկխոսությունը շատ բուռն է անցնում նույնիսկ այս համաճարակային տարում: Դուք երկու անգամ մանրամասն խոսել եք Մոսկվայում՝ ձեր հանդիպումների ընթացքում, բազմիցս խոսել հեռախոսով: Նախագահ Վլադիմիր Պուտինը Ձեզ է փոխանցում ամենաջերմ մաղթանքները՝ ձեր երկրի զարգացման և Լեռնային Ղարաբաղի կարգավորման շուրջ ձեռք բերված պայմանավորվածությունների կատարման գործում։

Գալիք տարում մենք նշում ենք մեր դիվանագիտական հարաբերությունների 30-ամյակը, Բարեկամության, համագործակցության և փոխադարձ օգնության հիմնարար պայմանագրի 25-ամյակը: Սա կարևոր փաստաթուղթ է, որը սահմանում է մեր հարաբերությունները երկար տարիներ և հետևողականորեն իրականացվում է բոլոր ոլորտներում ՝ տնտեսություն, քաղաքական կապեր, ռազմական, ռազմատեխնիկական համագործակցություն:

Ռուսաստանը պարտավորվել է ապահովել մեր դաշնակցի՝ Հայաստանի Հանրապետության անվտանգությունը: Սա քննարկվել է նաև Ռուսաստանի նախագահ Վլադիմիր Պուտինի հետ ձեր շփումների և մեր պաշտպանական գերատեսչությունների կանոնավոր ինտենսիվ փոխգործակցության ընթացքում: Սրանում նույնպես կասկած չի կարող լինել:

Մենք բարձր ենք գնահատում Լեռնային Ղարաբաղի կարգավորման շուրջ ձեռք բերված պայմանավորվածությունները: Մենք երախտապարտ ենք ձեզ ՝ Ռուսաստանի, անձամբ նախագահ Վլադիմիր Պուտինի դերն ընդգծելու համար այն ջանքերում, որոնք հնարավոր են դարձրել դադարեցնել ռազմական գործողությունները և համաձայնեցնել բոլոր կողմերի հետագա գործողությունների կայուն շրջանակը:

Մենք ամենաակտիվ կերպով աջակցում ենք եռակողմ աշխատանքային խմբի գործունեությանը՝ Ռուսաստանի, Հայաստանի և Ադրբեջանի փոխվարչապետերի մակարդակով, որոնք գործնականում նշանակալի են և կարող են այս փուլում ամենանշանակալիցը լինել՝ տնտեսական և տրանսպորտային հաղորդակցության ապաշրջափակման հարցերում: Այն հնարավորություն կտա գործնականում (ոչ միայն քաղաքական մակարդակում, քանի որ դա արդեն արվել է) վերջ դնել Հայաստանի շրջափակմանը և ապահովել տարածաշրջանի բոլոր երկրների փոխշահավետ փոխգործակցությունը ՝ ի շահ բոլորի:

Իհարկե, մեր խաղաղապահ զորքերը կշարունակեն իրենց առաքելությունը Լեռնային Ղարաբաղում: Եռակողմ համաձայնագիրը ապահովում է խաղաղապահների լիազորությունները `կապված Լեռնային Ղարաբաղի բնակչության անվտանգության և Լաչինի միջանցքի գործունեության հետ: Մեր խաղաղապահները կանեն ամեն ինչ `լուծելու մնացած խնդիրները` կապված շփման ճշգրիտ սահմանմանագծի և  դրա անցնելու հարցով փոխշահավետ պայմանավորվածությունների ապահովման հետ։ Եվ, անկասկած, Հայաստանի ու Ադրբեջանի միջև դելիմիտացիա, դեմարկացիա  հնարավոր կլինի, երբ այս բոլոր քայլերն իրագործվեն:

ԵԱՀԿ Մինսկի խմբի մյուս համանախագահների հետ համատեղ մենք շարունակում ենք հանդես գալ բոլոր հումանիտար հարցերի լուծման, այդ թվում՝ պահվող անձանց վերադարձի գործընթացն ավարտելու դիրքերից: Հասկանում ենք այդ քայլի խորհրդանշական, հոգեբանական նշանակությունը և վստահ ենք, որ մոտ ժամանակներս կկարողանանք լուծել այդ խնդիրը: Դա դրական, կառուցողական մթնոլորտ կստեղծի վերջնական կարգավորման հետագա բոլոր հարցերում առաջ շարժվելու համար: Ամեն կերպ կաջակցենք այդ հարցերի լուծմանը բոլոր ձևերով, ձևաչափերով՝ և՛ նախորդ տարվա նոյեմբերի և այս տարվա հունվարի եռակողմ հայտարարությունների իրականացման գծով, և՛ ամեն կերպ կխթանենք ԵԱՀԿ Մինսկի խմբի համանախագահների՝ հնարավորինս դրական մթնոլորտի ձևավորմանը միտված գործունեությունը՝  մնացած բոլոր հարցերի հետագա լուծման նպատակով:

Կրկին շնորհակալություն Ձեր կողմից ընդունելության հնարավորության համար: Համոզված եմ, որ մեր այսօրվա բանակցությունների արդյունքները ինչպես Արտաքին գործերի նախարարությունում, այնպես էլ Ձեզ հետ, թույլ կտան առաջ տանել մեր դաշնակցային հարաբերությունները բոլոր ոլորտներում»,- ասվում է հաղորդագրությունում: