Ձեր վստահելի աղբյուրը

«Ցավոք, պատերազմի ընթացքում միջազգային կառույցների լռությունը նաև բերեց մարդու իրավունքների խախտումների այդ ծավալի»,- Ազգային ժողովում ասաց Մարդու հրավունքների պաշտպան Արման Թաթոյանը՝ պատասխանելով «Լուսավոր Հայաստան» խմբակցության անդամ Կարեն Սիմոնյանի հարցերին:

Նա նշեց, որ Ադրբեջանը միշտ տարել է Արցախը մեկուսացնելու քաղաքականություն:

«Ես միջազգային կառույցներին բաց ասում եմ, որ իրենց լռությունն էր, որ բերեց սրան, ձեր լռությամբ խաթարեցիք մարդու իրավունքների հեղինակությունը՝ այդ թվում խնդիրներ առաջացնելով իմ աշխատանքում:

Հիմա ինչ՝  ստացվում է, քաղաքացին պարզ հասկացավ, որ  պատերազմը, զինված հարձակումը դադարեց ոչ թե նրա համար, որ մարդու իրավունքների միջազգային կազմակերպությունը դա դադարեցրեց, այլ որ քաղաքական կոնկրետ ճանապարհներով էր լուծվում խնդիրը»,-ասաց Ա. Թաթոյանը:

Նա նշեց, որ մարդու իրավունքների կառույցներն այստեղ հետ էին քաշվել, և ամբողջ հարցը քաղաքական տիրույթում էր. «Օրինակ, հարց՝ հիմա ինչո՞ւ մարդու իրավունքների ոչ մի կազմակերպություն Արցախ չի այցելում: Կարո՞ղ է որևէ մեկն ինձ բացատրել: Դրա համար միջազգային կառույցներին ասում եմ՝ ձեր  պահվածքով վնասել ենք մարդու իրավունքների համակարգը: Լինելով միջազգային կառույց՝ պարտավոր եք մեր քաղաքացու իրավունքների պաշտպանության ուղղությամբ լիարժեք աջակցություն ցուցաբերել, որ չստացվի, թե մեր երկրում մարդու իրավունքներն ու ժողովրդավարությունը հակասում են անվտանգությունը:

Իրականում մարդու իրավունքները, ժողովրդավարությունն ու անվտանգությունը լրացնում են իրար: Որքան բարձր է անվտանգությունը, այնքան բարձր են մարդու իրավունքները և հակառակը»:

ՄԻՊ-ն ասաց, որ մարդուն դնում է բոլոր հարցերի հիմքում:

«Ամենավառ օրինակը Սյունիքի մարզն է: Միջազգային կանոններ են, որ սահմանների հետ կապված գործընթացը չի կարող  խաթարել մարդկանց բնականոն կյանքը: Սա պարտադիր, աքսիոմատիկ սկզբունք է:

Երեք հիմնարար սկզբունք կա՝ մարդու իրավունքներ, ժողովրդավարություն, իրավունքի գերակայություն: Այստեղ ոչ մեկ չունենք պահպանված»,- ասաց Արման Թաթոյանը: