Ձեր վստահելի աղբյուրը

«Հայաստանում նոյեմբերի 9-ից հետո մի քանի 100 կիլոմետր նոր սահման է ձևավորվել, մինչև հիմա ճշտված չէ, չեմ կարող ասել, թե Հայաստանի 29 հազար կիլոմետրից ինչքան է մնացել»,- «Ազգային անվտանգության ծառայության պահեստազորի սպաների միություն» ՀԿ հրավիրած ասուլիսում  ասաց գեներալ-մայոր, ԱԱԾ սահմանապահ զորքերի նախկին հրամանատար Արմեն Աբրահամյանը:

Նա նշեց, որ այն, ինչ այսօր կատարվում է սահմանում, ուղղակի սխալ է: 

«Իշխանություններն ասում են՝ դեմարկացիա են անում: Այդպես դեմարկացիա չեն անում: Սահմանագծման, սահմանազատման աշխատանքների համար պետք է միջպետական հանձնաժողովներ ստեղծվեն ԱԳՆ համակարգմամբ»,- նշեց գեներալ-մայորը:

Նա նշեց, որ  սահմանագծման, սահմանազատման աշխատանքներն առաջին հերթին  դիվանագիտական աշխատանք է, պետության հարցն է, պետք է այդ աշխատանքներում ընդգրկվեն նաև լավագույն մասնագետները:

«Թողնել զինվորականների վրա, որ նրանք զինված իրար հետ սահմանագիծ որոշեն, սխալ է, կարող է ունենալ անկանխատեսելի հետևանքներ»,- ասաց Արմեն Աբրահամյանը:

Նա նշեց, որ կան գեոդեզիական ճշգրիտ սարքեր, որոնց միջոցով է կազմակերպվում այդ ամեն ինչը. «Դա շատ ծանր աշխատանք է: Վրաստանի հետ սահմանագծման,  սահմանազատման աշխատանքները  սկսել ենք 1996 թվականից: 25 տարի է և մինչև հիմա ավարտված չէ այն դեպքում, որ Վրաստանի հետ բարիդարիացիական հարաբերություններ ունենք: Ավարտված չէ նաև ադրբեջանա-վրացական սահմանի ճշգրտումները:

Դրա համար, երբ հայտարարում են, թե Սյունիք մարզում կատարվում են դեմարկացիոն աշխատանքներ, զարմանալի է, ոչ պրոֆեսիոնալ մոտեցում է»,- ասաց Ա. Աբրահամյանը:

Նա ընդգծեց, որ հաշվի առնելով ադրբեջանիցների հետ այսօվա հարաբեությունները,  բացարձակ անհնարին բան է սահմանագծման, սահմանազատման աշխատանքներ կատարել նրանց հետ: Գեներալ-մայորը գտնում է, որ հնարավոր է այդ աշխատանքները կատարել, եթե միջնորդ պետություն լինի:

«Օրինակ, Ռուսաստանը միջնորդ է հանդիսացել պատերազմը դադարեցնելու համար, կարող են խնդրել միջնորդ լինի նաև սահմանների ճշգրտման հարցում: Այլ հնարավորություն չկա»,- ասաց նա:

Ինչ վերաբերում է Թուրքիայի հետ սահմանի բացմանը, ասուլիսին ներկա ՀԿ-ի խորհրդի անդամ, գեներալ-մայոր, ԱԱԾ նախկին տնօրեն Արթուր Վանեցյանն ասաց, որ Հայաստանի ոչ անվտանգային համակարգը, ոչ տնտեսությունը այսօր պատրաստ չեն դրան. «Ես գտնում  եմ, որ այս հարցը առհասարակ այս փուլում պետք է օրակարգից հանվի, մինչև չվերականգնվի Հայաստանի անվտանգային համակարգը և տնտեսությունը պատրաստվի սահմանների հնարավոր բացմանը: Բայց այս փուլում խոսել դրա մասին և օրակարգում պահել, ուղղակի անթույլատրելի է»:

Խոսելով առաջիկա հնարավոր ընտրություններին մասին, ՀԿ-ի խորհրդի նախագահ, ԱԱԾ  տնօրենի նախկին առաջին տեղակալ գեներալ-լեյտենանտ Հրանտ Եպիսկոպոսյանն ասաց, որ ներկա պահին չեն տեսել որևէ կուսակցության ծրագիր: Նա ընդգծեց, որ այդ ծրագրում անպայման պետք է լինի ԱԱԾ վերաբերյալ հարցեր:

ԱԱԾ նախկին տնօրենի ժամանակավոր պաշտոնակատար, գնդապետ Միքայել Համբարձումյանն ասաց, որ նախընտրական քարոզչության ընթացքում հետևելու են կուսակցությունների ծրագրերին, իրենց առավելապես հետաքրքրում է, թե ինչ  տեսլական ունեն  անվտանգության ծառայության զարգացման և ապագայի հետ կապված:

«Համապատասխան փուլում հետևություններ կանենք ու կկողմնորոշվենք, թե ինքներս որպես անհատներ կամ որպես ՀԿ ինչպիսի դիրքորոշում կգրավենք ընտրությունների հետ կապված: Կարծում եմ՝ եթե ոչ ՀԿ-ի անունից, ապա որպես անհատներ մեր կարծիքը կբարձրաձայնենք»,- ասաց նա:

Ինչ վերաբերում ԱԱԾ գործունեությանը և պատասխանելով հարցին, թե հասարակության մեջ ԱԱԾ-ն ընկալվում է որպես ընդդիմության գլխին սարքող,  քրեական գործեր հարուցող կառույց, իսկ երբ Նիկոլ Փաշինյանն ընդդիմադիր էր, ասել էր՝  ԱԱԾ-ն համարվում է  ընդդիմության գրասենյակներում ժուչոկ տեղադրող  կառույց, Հրանտ Եպիսկոպոսյանն ասաց. «Ես աշխատել եմ մինչև 2016 թվականը, տարաձայնություններ ունենալով իմ ղեկավարի հետ,  դուրս եմ եկել համակարգից: Ինչ վերաբերում է մեր տարիներին, կարող եմ ասել, որ ժուչոկի մասնագետները ավելի շատ են տարածվել ներկա իշխանության օրոք»: