Ձեր վստահելի աղբյուրը

«Չկան բարոյական պատնեշներ, սահմաններ օրվա իշխանությունների համար՝ ի դեմս Նիկոլ Փաշինյանի և իր թիմի: Ես այն մարդկանցից եմ, ովքեր վտանգավոր են համարում այս իրավիճակում ընտրությունների գնալը»,- «Հայելի»  մամուլի ակումբում հայտնեց հոգեբան Կարինե Նալչաջյանը և շեշտեց, որ չի կասկածում, որ Նիկոլ Փաշինյանը չի կանգնելու որևէ բանի առաջ և իշխանական ռեսուրսներն ամենակոպիտ և գռեհիկ ձևով օգտագործվելու են:

Հոգեբանը համոզմունք հայտնեց, որ այս ընտրություները վատ իմաստով մեծապես տարբերվելու են նախորդ ընտրություններից, բայց եթե լինելու են, ապա նրա մեջ պետք է մտնեն պարկեշտ, հայրենիքի փրկության մասին մտածող  և հետագայում էլ զարգացումն ապահովելու կարողություն ունեցող անձինք, որոնք շատ են Հայաստանում:

«Միայն թմբիրի մեջ գտնվողներից չի բաղկացած հասարակությունը, մարդիկ հասկանում են, որ ինչ-որ բան անել է պետք»,- նկատեց Նալչաջյանը և հավելեց, որ ներքին խուճապի մեջ գտնվող քաղաքացիներին կողմնորոշել է պետք՝ բացել նրանց աչքերը:

Հոգեբանը հայտնեց, որ միշտ էլ ընտրությունների ելքը կախված է չկողմնորոշված ընտրողների որոշումից և նրանց համակրանքը շահում են այն ուժերը, որոնք կարողանում են ճիշտ աշխատել այդ շերտի հետ:

Կարինե Նալչաջյանը նկատեց, որ Փաշինյանի ջատագովների գրեթե չի հանդիպում, բայց շատ են միջանկյալ դիրք  գրավողները:

«Այսպիսի քարացած ստերեոտիպային մի արտահայտություն կա՝  «հո ես փաշինյանի կողմնակիցը չեմ, հո ես սրանց կողմնակիցը չեմ», ու հետո գնում է «բայց»-երը»,- հայտնեց հոգեբանը և նկատեց, որ ժամանակին ոգևորված բազմությունից մի մեծ մաս եկել և միջանկյալ դիրք է գրավում:

Նրա խոսքով՝ մարդիկ հասկանում են, որ իրավիճակը մեղմ ասած այն հունով չի գնում և նրանք պետք է նաև հասկանան, որ ապագայի հանդեպ պատասխանատվություն  բոլորն ունեն և պետք է ճիշտ ընտրություն կատարեն: